Cjavàs, il paîs des cevolis

Cjavàs al è un comun di 1.500 abitants te provincie di Pordenon, tai pîts des prealps cjargnelis. Rivâts te place principâl, si fâs notâ subit il palaç Polcenigo-Fanna, cumò sede dal comun, par ducj il Palazat. Chi e je ospitade une sede dal museu de vite contadine Diogene Penzi, dedicât ae emigrazion furlane e al lavôr (www.museodellemigrazione.it), che al merete une visite.
Tal teritori si cjate ancje une cevole uniche in Italie: la cevole rosse di Cjavàs (www.cipollarossadicavasso.com), biele taronde, dolce e digjeribile, testemoneance di un savê antîc. A jerin lis feminis che si tramandavin lis semencis di mari in fie e che si ocupavin di dutis lis fasis di lavorazion, di preparazion des riesti (lis trecis) e infin de vendite tai paîs dal Friûl. La sô coltivazion e je stade interote dal taramot e po ridusude a produzion familiâr de omologazion agroalimentâr, ma vuê e je tornade a jessi part integrante de microeconomie locâl e di pôc e je deventade ancje presidi Slow Food.
Une curiositât di toponomastiche: il non «Cavasso» al ven de peraule cavàs (gjave di piere). La denominazion «Nuovo/Gnûf» e je stade zontade tal 1886, daspò de anession ae Italie. (Nat. Gar.) ❚