Ream Unît: i risultâts eletorâi cuntun voli ai partîts nazionâi

Il mês stât a son stadis lis elezions pes assembleis legjislativis di Scozie, Gales e Irlande dal Nord, e par diviers comuns inglês.
In Scozie i eletôrs a àn premiât il Scottish National Party (SNP). I indipendentiscj a àn cjapât il 46,5% dai consens, in cressite dal 1,1% rispiet aes elezions stadis, ma par vie dal sisteme eletorâl si cjatin cun 63 deputâts, 6 in mancul de volte stade e doi sot dal vê la maiorance assolude in Parlament. Il partît di Nicola Sturgeon al guviernarà pal tierç mandât di file: al reste di capî se cuntun guvier di minorance o cuntune aleance cui Verts, che a àn cressût il numar di deputâts di 2 a 6. Sconfite penze pai Laburiscj che a pierdin 13 elets: cun dome 24 parlamentârs a son superâts dai Conservadôrs che a otegnin 31 deputâts, 16 in plui de volte stade. I Liberâi Democratics a mantegnin i lôr 5 elets.
In Gales invezit i Laburiscj a rivin a tignî bot e, si ben che a pierdin il 7,6% dai vôts, a rivin a elei 29 deputâts, un in mancul des elezions passadis e doi sot de maiorance assolude. Sucès impuartant dai nazionalitaris galês dal Plaid Cymru che cun 12 elets (un in plui de volte stade) e vôts in cressite dal 1,3% a deventin il secont grup de Assemblee, passant i Conservadôrs che a van jù di 14 a 11. La sorprese e rive però dai populiscj antieuropeans dal UKIP che cul 12,5% dai vôts a jentrin pe prime volte te Assemblee Nazionâl dal Gales cun 7 deputâts. Ai Liberâi Democratics i cuatri elets che a vevin za.
Par chel che al rivuarde la Irlande dal Nord, il Democratic Unionist Party (DUP) al piert un tic (-0,8%), ma cul 29,2% di vôts e 38 elets si confermin tant che prime fuarce. Conferme ancje pal Sinn Féin che cul 24% di consens e 28 deputâts al rapresente il secont partît e il prin tra l’eletorât nazionalist irlandês pur pierdint un elet. In flession ancje il secont partît nazionalist, Social Democratic and Labour Party (SDLP), jù di 14 a 12 deputâts. I rive devant l’Ulster Unionist Party (UUP): 16 elets. 8 deputâts pal Alliance Party che si conferme cuinte fuarce politiche de Assemblee nordirlandese. I Verts a son passâts di 1 a 2 elets, dopleant i vôts. Un gnûf sogjet politic de çampe radicâl irlandese, People before Profit Alliance, al jentre pe prime volte inte Assemblee nordirlandese cun 2 deputâts. A completâ il cuadri un elet pal Traditional Unionist Voice e un deputât indipendent.(Internazionalitari/LPdF) ❚