1976-2016: la Provincie di Udin pe rinassite “cul cjâf”

La catastrofe dal sisme e à segnadis lis nestris aministrazions locâls che a àn coordenât cun fuarce il procès di ricostruzion e la Glesie furlane e à vût un rûl determinant. «Dal taramot si ven fûr cul cjâf e no cui pîts», il sproc di pre Checo Placerean che al à stimolât la nassite de Universitât dal Friûl sostignude di ben 125 mil firmis.
La Provincie di Udin si è impegnade, insiemi a di chei altris ents, intal dâ rispuestis sul front de assistence, garantint prin di dut la percoribilitât di 300 km di stradis intes zonis taramotadis.
Ancje la educazion dai zovins – l’avignî di une tiere – e veve di tornâ a partî il prin pussibil. I intervents intal ambit de edilizie scolastiche a deventarin la mission principâl dal Ent, midiant de deleghe regjonâl. Ve i numars: 500 aulis furnidis intai prefabricâts scolastics de Sierade dal ’76 fin ai agns Otante, 92 i ples scolastics costruîts, 110 miliarts di liris impleâts in chest procès.
Ce che al è stât fat al è stât il risultât di un lavôr che al à viodût la Provincie lavorâ flanc a flanc cui Comuns sedi pal posizionament dai prefabricâts sedi pal plan programatori.
E vignive scrite une gnove pagjine de storie dal Friûl che al à savût tirâ fûr des maseriis dal taramot la pussibilitât di un grant disvilup. (Redazion) ❚