(L)INT FURLANE. Il gjal al cjante trê voltis

✽✽ Prime che il gjal al cjantàs, Sant Pieri al à tradît Jesù trê voltis. Ancje il spirt de ricostruzion post taramot al cognòs chel numar par ce che al tocje i plui grancj responsabii di dut chel che nol è stât puartât insom su la strade indicade in chei agns dai furlans.
✽✽ La prime responsabilitât e va assegnade ae Regjon e ae sô classe politiche, che no je stade buine in chescj cuarante agns di rinfuarçâ il leam istituzionâl cu la comunitât. I palaçs dal podê no son plui al servizi dai Comuns, no rapresentin il moment de sintesi legjislative metude in at par favorî il disvilup dal teritori.
✽✽ Anzit, al contrari, in chest periodi a àn, di fat, cancelât cualsisedi forme di colaborazion cui ents locâi. La fin dal decentrament, il sumâsi des competencis, come che a dimostrin lis Uti, al va pâr a pâr cuntune simpri plui grande dipendence des sieltis des segretariis romanis dai partîts e cuntune mancjance totâl di autonomie.
✽✽ La seconde realtât sot acuse e puarte il non di Universitât di Udin, simpri mancul dal Friûl ancje inte denominazion e simpri plui, invezit, lontane des motivazions che le àn fate nassi de volontât popolâr dopo il taramot. E veve di jessi la scune de classe dirigjente e strument specific di cressite de culture furlane, e à sierât i cors plui indicatîfs e di prospetive, deventant la copie di un dai tancj ateneus sparniçâts fûr pe Italie, buine dome par creâ carieris academichis a docents no furlans.
✽✽ E infin ultime, ma dome parcè che e cree plui delusion e sconciert, e ven chê Glesie che tante part e à vût inte opare di resistence e dal disveâsi dai furlans, e di simpri custode preziose de marilenghe. Fûr che raris ocasions, vuê l’ûs dal furlan de bande dal clericât al è sparît, al reste latitant intes celebrazions: ai gnûfs e pôcs sacerdots, dispès che a vegnin di altris paîs e situazions, no si à lassât il valôr pastorâl dal furlan tant che espression profonde dal rapuart tra fede e popul.
✽✽ Ae fin però, nô ducj tant che comunitât furlane o vin di recitâ il “mea culpa” e pintîsi di no vê savût evitâ che dut chest al sucedès.
E se il gjal nol cjante, nol vûl dî che o sin stâts perdonâts. ❚
✒ Dree Valcic