55 sfumaduris di frico

Il plat, nassût come puar – al veve di jessi caloric, energjetic, ma par fuarce fat cui elements sempliçs che si vevin in cjase – al è stât aromai fat cognossi a nivel mondiâl. Par Arnaldo Zorzetto «al rive de tradizion, ma al à di cjalâ al avignî, si pues evolvi, cambiâ, restant fer tai siei ingredients di base: il formadi e lis patatis».
«Inovâ al vûl dî sperimentâ e contaminâ: nô o proponin 55 gjenars diviers di fricos, zontant une aromatizazion. Si trate di personalizâ il prodot a un puest. O vin scomençât cun Tavagnà e cu la sagre dai sparcs, li che o vin proponût propit un frico ai sparcs. A Atimis, il frico aes freulis. Pal passaç dal Zîr di Italie, o vin ufiert frico rose; lu fasìn ancje neri, cul cjarbon vegjetâl; a Vençon, lu vin vendût cu la lavande, pal Far East Film Festival, frico al wasabi.»
Inovazion e je contaminazion di savôrs e di guscj par Zorzetto: «Se il nestri frico al maride altris aromis, si vierç di bessôl lis puartis a altris marcjâts, cence lâ a cirî robis strambis» (tant che il frico vegan). ❚
(Os.Pun.)