Sfuei Mensîl Furlan Indipendent
Archivi de Patrie

Frico e fantasie cun Arnaldo Zorzetto, e a Otubar il FRICO plui lunc dal mont

............

«Un frico vegan? Ma sino mats?». Sì: un frico vegan. Se il formadi al è un prodot che al ven dal nemâl, un frico vegan al vûl dî gjavâi il formadi e meti alc di compagn, che però nol è il formadi. Une marcje dal made in Cjagne lu à fat e lu sta vendint: il frico vegan. Arnaldo Zorzetto – imprenditôr e in passât gjestôr di locâi de movida udinese, fin che al à finît par vierzi a Cividât un puest là che il mangjâ furlan al è l’umbriçon dal mont – si suste. Il frico al è il master–plat de sô Osteria alla terrazza e di un progjet che, partît de citât ducâl, al è lât pes sagris di dut il Friûl. Ancjemò sul frico vegan: «Jo no discut lis sieltis di marketing, ma par plasê: no stait a clamâlu frico. Un frico cence formadi nol è frico. Vonde. Che lu clamin… ce saio jo… pete di cartufulis? Ma no frico».
La tutele dal prodot. Par cui che no lu cognòs, Arnaldo Zorzetto al è un personaç tant creatîf. Un vulcan di ideis. La ultime si davuelzarà chest atom: il frico plui lunc dal mont. Un fricon dilunc dai 86 metris dal Puint dal Diaul, a Cividât. Cun tant di documentazion video, doprant un dron. Parcè un event dal gjenar? «Par sburtâ la tutele dal prodot, sensibilizâ la int e tirâ dongje noaltris piçui produtôrs par fâ deventâ il frico Dop o Igp: cun tutele ricognossude e un dissiplinâr clâr, che lu pei al Friûl. La tutele dai produtôrs par prins. Problemis come che a son stâts cul Tokai, no ju viôt, nol è pericul che il prodot nus vegni robât. Ma za vuê al supermarcjât si cjate frico produsût in Lombardie. Alc al va fat par blocâ chestis delocalizazions: il frico al à di jessi un prodot di un teritori».
Po dopo, si à di frontâ il probleme dal non. No ducj a san che Frico al è un non comerciâl olandês regjistrât, di une aziende grandonone che e prodûs formadi. Par capîsi: une specie di Nutella dal lat lavorât, pressât e, si fâs par dî, insacât: baste viodi la galarie des piecis di formadi sul web. Prodots che a van ancje in Gjermanie, France e Spagne. La Frico Cheese e à za jevât pucis in passât sul non, par vie che al è regjistrât e che in Olande al identifiche un prodot specific, come la Nutella pe creme di cjocolate. «Dome Savio, il produtôr plui impuartant di frico chi di nô, al è rivât a vê une liberatorie par doprâ il non. La idee dal event di Cividât e vûl creâ un Consorzi o une Associazion di impresis par studiâ soluzions buinis pal marcjât e prudelâlu cuntun dissiplinâr».
Street food. Zorzetto al à pandût il frico ator pal Friûl maridant il concet dal Street food, frico tant che “mangjâ di strade”. La sô Ostarie e je intune vie strete, e par vie de assonance cul non street lu à lançât su Tripadvisor tant che locâl che al propon mangjâ origjinâl e gjenuin. Cuatri agns za fa, si è inventât il Frico-burger, un panin implenât di frico, pratic di cjapâ sù e di puartâ vie.
No “mangjâ e murî” ma: mangjâ e talpinâ pe storie de citadine su lis aghis da Nadison. Slargjant la filosofie, si è inventât une ApeCar par dâ fûr il Frico-burger ator. L’an passât, a Friulidoc, al à vendût 1500 panins di frico.
E invezit, la partecipazion al Street Food Truck Festival (event davuelt a Udin in Zardin Grant, tancj furgons e birocins che a proponevin mangjativis di cualitât) lu à fat incuintrâ cun chei di Farinel on the road, che dai Cjanâi dal Canavês (Piemont) a proponevin la “miasse”, piadinis di polente, cuetis sul fier ardint. «E cussì,o vin proponude ancje une piadine furlane: cun dentri ce che un al vûl. Il persut di Sant Denêl o il stes frico».
La invenzion che invezit e à plui pandût il non di Zorzetto ator al è Man vs Frico, une kermesse che e zire par locâi e sagris. Vêso presint lis garis che a vadin a butinton in Americhe, dulà che un al sfide altris concorints a mangjâ une cierte cuantitât di hamburger, plui svelt che al pues? Man vs Frico e je une gare jenfri mangjadôrs di frico. Si scuen parâ jù un chilo e mieç di robe. A àn za partecipât in 230 di lôr. Il record lu à Marco Giorgiutti che al à netât il plat in 3 minûts e 7 seconts. ❚
✒ Oscar Puntel

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +