Sapade-Plodn, gnove frenade

Nuie di fâ, par tornâ a viodi Sapade-Plodn furlane al tocje ancjemò spietâ. La politiche romane e à tornât a meti i bastons tes ruedis discjadenant, justementri, la rabie dai sapadins e dai furlans che si stan batint di une vite pe cuistion. Dopo jessi rivâts adore a fâ passâ la leç pal passaç di regjon tes dôs comissions dal Senât (Belanç e Afârs Costituzionâi), sul plui biel, cuant che si doveve calendarizâ la discussion in aule, une part di senatôrs dal Pd, cul benstâ dal Guvier, a àn decidût di tirâ a dilunc il dut, cjapant timp e tirant fûr gnovis scusis.
Tal comun dal cjadovri le àn cjapade mâl, clâr: “l’enesim tradiment” a àn zigât sindic, consei e comitâts che di corse si son cjatâts in Municipi par votâ un ordin dal dì che al domande ai parlamentârs di tornâ a cjapâ subit in man la discussion e votâ la leç che – impensìnsi – si le sta spietânt dal 2008, cuant che i citadins in maniere democratiche a àn sielzût a maiorance di domandâ di tornâ in Friûl.
“Un scufiot vergognôs ae democrazie” lu a definît il sindic di Sapade-Plodn, Manuel Piller Hoffer. “Di gnûf i politics a àn volût lavâsi lis mans par pôre di decidi; al è evident che il passaç di un comun di une regjon “ordenarie” a une “speciâl” i à fat cjapâ un spac al Guvier e al Partît Democratic dal Belumat e dal Venit in gjenerâl. Cussì par noaltris nol reste che il limbo”.
Dal stes tenôr i coments dai comitâts: “il Belumat nus à svendût par un plat di lints; baste viodi la votazion scandalose che al à fat il consei provinciâl di Belum la vilie de decision dal Senât, dineant di fat se stes rispiet a ce che al jere stât decidût agns indaûr. Cumò o domandìn che i politics furlans a detin bataie fin insom par mantignî lis promessis fatis in ducj chescj agns”.
Clâr aromai a ducj che il pas indaûr dal venit, tacant dal President Zaia e rivant fintremai al sotsegretari Bressa, al mire a meti Sapade sul plat de discussion cun Rome pe cuistion de Autonomie regjonâl che al stan cirint di otignî. E cussì si torne a tirâ fûr il discors di un font di riecuilibri che il Friûl al dovarès paiâ a ducj chei comuns di confin, o ben ce che al sucêt cul Trentin e il Sudtirôl. Cence volei capî che il paragon nol rêç par doi motîfs: Sapade al è un câs unic, al è un paîs furlan, che si sint furlan e che al vûl tornâ in Friûl; po dopo, lis risorsis che a àn Trentin e Sudtirôl, sigûr a statût speciâl tant che noaltris, ma no podin però vignî paragonadis a chês che o vin a disposizion te nestre regjon.
La Presidente Serracchiani e je stade clare, almancul a peraulis: “Su Sapade no moli – e à rispuindût al coleghe Zaia – l’iter al è lât tant indenant che no si pues plui tornâ indaûr. E o soi pronte a incuintrâ personalmentri i cjâfs grup di Cjamare e Senât, i Ministris Boschi e Costa, e il sotsegretari Bressa par rivâ adore a otignî il vôt decisîf”.
Nol reste che spietâ Pasche e viodi se ta chel benedet calendari dal Senât, il non di Sapade al tornarà a jessi scrit tal ordin dai lavôrs. Pensait che di cuant che e je tacade la storie, e sarès la dusinte e cjapilu volte… ❚
✒ David Zanirato