IL PERSONAÇ STORIC. Francesc Creme dai Bulgars

Francesc Creme dai Bulgars (nassût a Cividât sul finî dal secul XV, muart a Cividât ai 14 di Lui dal 1525), si fasè cognossi tant ben pe sô erudizion, culture e sensibilitât in ogni sience e art, che l’Imperadôr Massimilian I lu volè clamâ tant che precetôr dal zovin Carli di Asburc, il futûr e potentissim Carli V. Inte grande cort imperiâl Francesc al podè dividi il so compit, jenfri il 1512 e il 1520, insiemi cun Adriaan Florenszoon, miôr cognossût plui tart cul non di Pape Adrian VI. Mestri di un imperadôr e amì personâl di un pape, al preferirà ritirâsi inte sô Cividât par dedicâsi ae filosofie. Lis sôs oparis, che a àn di jessi stadis une vore preseadis tal so timp, a son sparidis dai manuscrits des bibliotechis, e nol esist cuasi nuie di editât a so non. ❚
✒ Agnul Floramo