FRIÛL EUROPE. TTIP, ce isal? E je une Europe che e dîs di no a chest tratât, cun ancje il Friûl dentri

Al è cui che al dîs di no. No je la version par furlan dal titul di une innomenade cjançon di Vasco Rossi, ma, in struc, al è ce che al è saltât fûr di un incuintri european che si à davuelt a Barcelone ai 21 e ai 22 di Avrîl. Cun di fat, te capitâl de Catalogne si àn dât dongje i rapresentants di une schirie di aministrazions locâls dal continent cun chê di fâi cuintri ai gnûfs tratâts comerciâi internazionâi, che des dôs bandis dal Ocean Atlantic si varès voie di meti dongje, in non di chel che al ven clamât marcjât libar. Te smicje al è soredut l’innomenât TTIP (Transatlantic Trade and Investment Partnership), chel acuardi che al è daûr a jessi metût adun cun chê di rinfuartî lis relazions comerciâls tra la Union Europeane e i Stâts Unîts, daûr dai principis dal neoliberisim.
In cont des negoziazions dal TTIP, ai 8 di Lui dal an passât, si veve esprimût ancje il Parlament European, ae fin di un dibatit çuet, cun diviers rinviaments, tra une minorance di eurodeputâts – soredut dai grups de Çampe alternative e dai Verts e de Aliance Libare Europeane – che a mostravin di jessi atents, documentâts e par chel une vore critics e preocupâts e la plui part di lôr che a palesavin une motivazion e une atenzion pardabon minimâls. Il risultât al è stât une risoluzion, fate buine cun 436 vôts a pro, 241 cuintri e 30 astignûts, che e domandave ae delegazion de UE di lâ dilunc inte tratative, ma e faseve indenant une schirie di racomandazions che però no someavin – e no somein nancje cumò – in stât di condizionâle in maniere positive, par esempli in materie di pesticidis e di organisims modificâts gjenetichementri, cemût che a àn denunciât cualchi setemane indaûr Greenpeace, Friends of the Earth e il Corporate Europe Observatory.
Cundut de pocje atenzion che ur ven dade de bande dai media “mainstream”, diviersis analisis a mostrin che il TTIP forsit al garantìs i interès di uns pôcs di lôr, ma par sigûr al menace a fuart l’ambient, la salût e i dirits di ducj, in Americhe e soredut in Europe. Cun di plui, ancje lis percentuâls di incressite economiche previodudis a son une vore limitadis e duncje il belanç preventîf al è falimentâr in ducj i sens.
La sperance e je chê che il parlament european si dismovi e che al moment di valutâ il test definitîf al rivi adore a votâi cuintri. Par intant, la preocupazion e reste e la mobilitazion de societât civîl e di diviersis aministrazions locâls e va indenant. Passe 1.500 comuns a àn declarât la lôr contrarietât al TTIP: tra chescj a son citâts tant che Viene, Birmingham, A Coruña, Madrid, Grenoble e Barcelone, che e à clamât dongje i rapresentants di une cuarantine di chestis aministrazions, di diviersis bandis de Europe.
Al jere ancje il Friûl, cun Walter Mattiussi, conseîr comunâl di Merêt di Tombe, l’unic comun dal Stât talian presint, che al marche che «acuardis tant che il TTIP a son un pericul pai citadins, pai ents locâi e pal disvilup sociâl e economic des nestris comunitâts». «Par chel ancje Merêt di Tombe – al zonte il sindic, Massimo Moretuzzo – al à dât la sô adesion ae Declarazion di Barcelone che e domande la sospension des negoziazions di chescj acuardis e la garanzie des competencis des aministrazions locâls a pro di une economie teritoriâl, sostignibile, solidarie, sane e juste». ❚
Marco Stolfo