Contâ il mont e fâ marketing par furlan

Un libri par talian, ma che al fevele des potenzialitâts de lenghe furlane: L’efficacia della comunicazione di marketing in lingua friulana e al da cont de metodologjie e dai risultâts di une ricercje in cont dal ûs de lenghe furlane te comunicazion e te promozion comerciâl.
Al è stât metût adun di Franco Rosa cu la colaborazion di Michela Vasciaveo e Federico Nassivera.
Dai dâts tirâts dongje al salte fûr che il furlan ur da valôr ai prodots, in particolâr tal setôr agroalimentâr, che tancj di lôr a ricognossin e a presein la tipicitât e la cualitât dai prodots stes propit daûr dal ûs de lenghe tai nons e te comunicazion. A son ancje chei che a àn un prejudizi negatîf viers de lenghe o che a son indiferents, ma a son une vore di mancul.
Uniche pecje, la part introdutive che e somee jessi stade fate cun plui premure, cun definizions e comparazions che no convincin masse, a tacâ de nozion ambigue di “lingua locale”, che e je une peraule clâf di dut il libri. Informazions in rêt: www.forumeditrice.it. (M. St.) ❚