NO SON PERAULIS PAR VECJOS – VEGAN

_Mandi nono, âstu viodût che a àn inventât il frico vègan?
E ce jentrial il frico cul president american? Che nol è nancje plui lui, il president, no?
_Ma no, nono: no Reagan: vègan. Al è l’inglês di “vegàn”: un che nol mangje ce che al derive des bestiis.
Nancje luianie?
_No, nono: nuie luianie.
Ah, ben: un cussì lichignôs nol è nissune maravee che al resti vedran!
_Vegàn, nono: vegàn!
Dut câs il frico nol è mighe fat cun la cjar.
_I vegjetarians a son chei che no mangjin cjar e pes, i vegans no mangjin nancje chei altris derivâts animâi: ûs, lat…
Puars vedrans. Ma sono malâts? Ur fasie vignî mal di panze?
_No, a àn sielt cussì par no fâ mâl aes bestiis.
Ma. No ai mai sintût une gjaline lamentâsi par fâ un ûf.
_Ma lôr a son contraris a tignî i animâi impresonâts, sotans.
Si viôt che no àn mai provât a tignî une gjaline libare. E se a àn provât, sigûr che no jerin lôr a netâ dulà che e veve pulinât.
_E je ancje une sielte ecologjiche.
Ah, ben, alore a àn sbaliât dut.
_Parcè, nono?
Âstu mai sintût dî “dal lidric no si bute vie nuie” o “dal ardielut no si bute vie nuie”? Il purcit al è simpri la sielte miôr, frute: ancje pal ambient.
_Lasse stâ l’ambient, la robe plui impuartante par un vegan al è no fâ mâl aes bestiis.
Ancje ai moscjits?
_A son bestiis ancje chês.
Alore no son vedrans de Basse, sigûr. A saran cjargnei. Ma pal frico? Cemût fasino cence Montâs?
_No sai, a dopraran cualchi formadi fat cul lat di soie.
Lat di soie? Biele cheste! E cemût si molzie la soie?
_Ma no, nono: si clame “lat”, ma nol è propit…
Ma tu âstu mai viodût un fasulut di soie che al tete?
_Bon, lassìn pierdi.
Dut câs, frut, tu viodarâs che chê chi e je une mode che no dure masse.
_Parcè po, nono?
Cuant che si maridaran, chei vedrans, lis feminis ju fasaran tornâ a mangjâ broade e muset come ducj chei altris. ❚
✒ Bete Di Spere