(L)INT FURLANE. Une ocasion uniche pes fuarcis autonomistis

✽✽ O sin devant di doi moments impuartants pal futûr dal Friûl, ma ancje de Regjon.
Di une bande, di fat, e va indevant la racuelte di firmis che e varès di puartâ al referendum pe creazion ancje chi di dôs provinciis autonomis, sul model di Trent e Bolzan, intant che di chê altre si intensifiche la campagne di informazion, lis riunions, i progjets operatîfs pe formazion di un sogjet politic in stât di jessi maioritari tes prossimis elezions. O fevelìn dal Pat pe autonomie, sostignût a fuart di un grup di sindics e cu la poie esplicite, ma soredut teoriche, di Sergio Cecotti.
✽✽ Dutis dôs lis agregazions a declarin cun fuarce di colocâsi di fûr dai partîts, des logjichis di diestre e di çampe. Il sindic di Rivignan, Mario Anzil, ment e cûr dai referendums, si apele a ducj i furlans, cence distinzion di colôr e di apartignince politiche: il Pat al fâs de esperience scozese une idee vuide. A somearessin duncje partî di supuescj identics par un obietîf finâl comun. Epûr a esistin al moment pocjis relazions e iniziativis tra i doi. Ciert no esistin nancje contrascj publics, anzit.
Ae presentazion dal nestri gjornâl, che si è tignude a Merêt di Tombe, dutis lis fuarcis in cjamp a jerin presintis, la volontât di no prestâ il flanc a pussibilis operazions di division si è mostrade clare.
✽✽ A son di passâ in ogni câs ancjemò doi gjenars di difidencis. La prime e je leade ae rapresentance partitiche di cualchi esponent firmatari dal referendum: al fâs inriçâ il nâs a tancj la colocazion intal ambit dal centridiestre. Vicevierse, la velade acuse al Pat e je chê di podê rapresentâ in futûr la croçule eletorâl autonomiste pal Pd.
✽✽ La seconde e je plui concrete e razionâl: e rivuarde la tatiche su la cuistion triestine. Cecotti su chest al è stât clâr: atenzion, domandâ vuê la separazion, al vûl dî jessi mancul fuarts intal scuintri cul stât a difese de esistence stesse de Regjon. «Il so gnûf implant istituzionâl – al à sclarît il professôr – al sarà definît une volte salvade e rinfuarçade la autonomie».
Un invît clâr a no confondi tatiche e strategjie.
✽✽ Un altri pont dibatût, e nol podeve jessi in altre maniere, viodude la presince di tancj aministradôrs su la sene, al rivuarde lis Uti. Mi somee che la cuistion no esisti plui dopo il no sec de Serracchiani no dome a cualsisedi cambi di rote, ma nancje a une polse di riflession. Lis declarazions di Torrenti a àn fat il rest.
Lis Uti, par cemût che a son nassudis, par chel che a son programadis, a van refudadis parcè che a son ineficientis e antidemocratichis.
✽✽ La dialetiche duncje si conferme la uniche strade di lâi daûr, fissant, intai fats, la indipendence dai doi progjets dai partîts talians, jentrade necessarie sedi pal referendum sedi pal futûr sucès par un guvier autonomist. ❚
✒ Dree Valcic