SIMPRI BOGNS. Celso Macor, ‘I fûcs di Belen’, Cormons, 1996

Soi un spic di forment ta mitât, / un spic cressût tal soreli da viarta / tra mil flôrs e colôrs; / la mê vôs no si sint, al ciamp ‘l è grant: / jo meni ‘l ciâf ta buera e sberli. // Vevi ancje jo peraulis di dî, / ricuarz di meti ta suarza, / prin che passàs la falz.

Chest l’incipt de prime poesie de prime racuelte di Celso Macor (1925-1998), Impiâ peraulis, vignude fûr intal 1980, cuntune prefazion di Ervino Pocar, il grant gjermanist e tradutôr. Intal 1996, l’editor Braitan di Breçan di Cormons al à dâts fûr chescj doi volums intun elegant satûl, che a cjapin dentri l’opera omnia par furlan di Celso, cun chest titul cussì significatîf. In plui de racuelte dal 1980, o cjatin chi dentri lis prosis di I vôi dal petarôs (1986), cu la presentazion di Rienzo Pellegrini e, in jentrade, la flabe dal piçul ucielut che i gjave une spine a nestri Signôr su la crôs. Po, intal secont volum, lis poesiis di Se il flum al mûr (1989) cuntune note finâl ancjemò di Pellegrini, Tiara, in prose (1991), cu la postfazion di Sergio Tavano e, par ultin, Quinta stagion (1989-1995), ancjemò poesiis. E, par finî, une note dal editôr, Hans Kitzmüller. La traduzion par talian e je insom di ognidune des racueltis.
Cui che al à cognossût Celso di persone, nol pues dismenteâ cheste persone cussì storpeose, semplice e pûr plene di culture: ti bastave cjalâlu un moment intai voi e tu capivis che al jere un om bon. E chestis carateristichis si cjatilis dutis intai siei scrits. Che e sedi poesie o prose, il ton intimistic al è simpri chel e ancje i argoments no si slontanin: la nature, in particolâr la mont che lui al jere un apassionât, lis aghis (il Lusinç), i cjamps arâts dal Friûl di jevât, la lenghe furlane cussì tant amade (al jere restât mâl sintint un frut a dî puledri, invezit di puieri…). E po, la complessitât linguistiche e culturâl di chestis tieris, li che si incrosin furlans, todescs e slâfs e, duncje, la assurditât e la stupiditât des vueris (Lassêt che da montagnis i nestris fradis végnin ju / cun miluz e ciastinis / che li’ caretis a’ tornin ciaradis di blava…).
E naturalmentri il mont contadin là che lui al jere nassût e che i puartave simpri dongje tancj di chei ricuarts di no podê parâsi (Malandreta nostalgia). Epûr al rivave, chel istès, a cjalâ lontan: Ma tu tu âs di vivi, frut, / …jê tô la strada, côr che ‘l timp al mûr). ❚
Laurin Zuan Nardin