Racuelte di firmis par sburtâ il plurilinguisim in regjon, fonde de nestre specialitât

La taule taronde dal titul Bilinguisim e plurilinguisim tant che ricjece, dirit e oportunitât, che si è tignude sabide ai 14 di Novembar inte aule magne di Palaç Di Toppo Wassermann a Udin, in sieradure dal progjet I.BI.S. (Integrazion e Bilinguisim cun Sucès), e à puartât a dâ un messaç fuart e clâr che al rivuarde la diversitât linguistiche.
CE CHE AL È IL PROGJET_I.BI.S e je une iniziative, organizade de associazion Polonik (che e agreghe i polacs residents in Friûl-V.J.) cu la poie de Regjon, il patrocini de ARLeF (Agjenzie Regjonâl pe Lenghe Furlane) e dai Comuns di Udin e di Martignà. E je stade inviade la Vierte passade cuntun prin cicli di lezions e conferencise par gjenitôrs, educadôrs e insegnants. Dentri di I.BI.S. a son stâts organizâts ancje moments di agregazion multiculturâl e laboratoris interatîfs educatîfs e didatics par fruts.
IL DOCUMENT_Dilunc dal incuintri finâl, il dialic tra esperts al à puartât ae elaborazion e ae sotscrizion di un document par che si garantissi e che si promovi la educazion plurilengâl e il pluralisim linguistic tant che valôr, dirit e oportunitât. Lu àn firmàt, tra chei altris, ancje Franc Fari; Silvana Schiavi Fachin, Lorenzo Fabbro (president ARLeF).
Destinatarie principâl dal invît e je la Regjon autonome Friûl-Vignesie Julie, che si domandi di «operâ in chest sens, esercitant lis propriis competencis in ducj i setôrs conetûts cu la tutele des minorancis e cu la promozion dal pluralisim linguistic e eventualmentri domandant la assegnazion di gnovis competencis intal setôr de istruzion e de formazion, e duncje esercitantlis pe creazion di une scuele regjonâl là che la diversitât linguistiche rapresentade des minorancis linguistichis storichis e des comunitâts imigradis, e cjati citadinance plene e efetive intal cuadri dai siei programs e de sô ufierte formative». Une domande che e cjate la sô fonde intal «caratar multilengâl e multiculturâl de regjon Friûl-Vignesie Julie (…) inricjît ancjemò di plui de gnove imigrazion» e intal fat che «propiti la presince e la tutele des minorancis (…) a costituissin la motivazion principâl e il fin de autonomie speciâl de Regjon».Il test al è indreçât ancje ae Universitât dai studis dal Friûl, par che e operi in chest sens e secont che che al è previodût de sô leç istitutive e dal so statût. ❚ ✒ Redazion