Il Nadâl di îr tes peraulis di Gjeme, par rifleti su chel di cumò

Nadâl ancje chest an al è dibot par rivâ. E come ogni an, o tornarìn a viodi lis solitis corsis (fin ae Vee) par lâ a comprâ regâi, vistîts, mangjative e, te confusion gjenerâl indulà che lis robis materiâls a cjapin impuartance, o stentarìn a fermâsi un moment e a rifleti sul vêr significât dal Nadâl.
Lant indaûr di cualchi an, no propit tancj, il Nadâl al jere vivût in maniere diferente. Gemma Nodale Chiapolino, nassude a Sudri tal 1922, e conte che sô sûr e veve man a dissegnâ e a piturâ e cussì ogni an e dissegnave sul carton ducj i personaçs dal presepi. “In cjase o vevin un cjanton indulà che o fasevin il presepi: o lavin a cjoli il muscli e o preparavin dut di bessolis. Pe gnot di Nadâl, o vevin za dut preparât. Nô frutis o volevin lâ a messe di miezegnot te glesie di Ognissant ma a cjase no volevin parcè che o jerin piçulis. Ma nô o insistevin e, ae fin, nus davin il content. O jerin contentonis di lâ ancje se une volte no ‘nd jere nuie. Mighe come cumò che a no san ce che ur mancje.”
MADINS_Prime de messe a vignivin fats i Madins e cui voi lusints Gjeme si impense che cuntune vosone “Gno pari al cjantave dôs lezions, Consolamini Consolamini e A consurgere consurgere; jo o varai vût 6-7 agns. Po dopo, a disevin la messe di miezegnot che di solit e jere simpri par gno nono. E vignive cjantade ae vecje. Tal moment dal Glorie ducj nô fruts o lavin devant dal presepi cul predi che lu incensave, e po insiemi o disevin cualchi orazion. La messe e finive cul cjant Puer natus in Betlem. E nô, contentis e beadis, o tornavin a cjase e si metevin devant dal nestri presepi a cjantâ i cjants di Nadâl. Une volte al jere frêt e tantis voltis e jere ancje la nêf. Si metevin sù ce che o podevin: siarpis, capotuts. Prin di lâ a messe, a fasevin la bulide pai grancj e a nô nus davin une sedon di chest vin brulè e nô no volevin parcè che e jere robe fuarte. Alore o stuarzevin la bocje, però dopo che o vevin bevude cheste robe nus vignive sù un biel cjaldut e si sintivisi subit miôr, e dopo o frontavin sù lis clevis.”
CONTENTÂSI_ La dì di Nadâl si mangjave ce che al jere, ancje parcè che e jere avonde miserie e pai fruts no passavin Jesûs Bambins… “Par Sant Nicolau, si metevin fûr lis çuculis o i scarpets e nô no stavin propit te piel, o jevavin ancje di gnot par lâ a viodi se al jere za passât. Al puartave no grandis robis… magari un naranç.”
Altris timps sì, indulà che “no vevin nuie ma o jerin plui contents di cumò”, e indulà che la vite dai oms e jere plui peade aes tradizions, aes stagjons, ae religjon e no jerin gruessis pretesis.
E alore, come che si lei jenfri lis poesiis di Gjeme, ancje “il grant blancôr da nêf ti fâs trategni il flât; bielece che solêf a da al cûr turbât” e ancje il Nadâl al deventave un moment impuartant “A plûf dal cîl la lune / gotis di lûs di arint / la Mari ta gnot brune / a spiete il Diu nassint. / In Cîl un agnul cjante / la glorie al Signôr; / il scûr al si disfante: / s’insedin pâs e amôr.”
____
L’AUGURI
E alore l’auguri par chest an al è chel di riscuvierzi il vêr significât dal Nadâl, fat di semplicitât e di gjenuinitât, di chel Frut che plui di 2000 agns fa al à decidût di nassi intune stale… E po, come che a cjantavin in Cjanâl, “Su augurìn las buinas fiestas che i mangjais buinas mignestras e un an plen di fortuna cun buina luna. Amen!”. ❚
Marta Vezzi