CULTURE – Web tv par furlan? Dut di fâ

O cirivi lis web tv par furlan. Ce fature e ce delusion. O ai cjatadis ancje televisions locâls, ma cence servizis in marilenghe. In chel cjalderon che al è Internet fra pagjinis puaris e youtube. Stiçât di un comunicât stampe che mi vise che ancje la Arlef e à viert il so canâl cun trê filmâts, o ai decidût di indagâ il fenomen.
PRIMIS DELUSIONS_ Scomencìn pal ordin. La prime che o ai cjatade e je stade chê de Regjon Friûl, vâl a dî www.fvg.tv. Une vere television sul web, cun tant di pulsantiere virtuâl, ma dute talianote. In marilenghe vincjetrê videos «su domande», filmâts de Pimpa, documentaris, cualchi aprofondiment. Se magari a inzornassin il servizi, no sarès un brute idee: l’ultin aprofondiment al è dai 25 di Setembar dal 2006. Scuasit trê agns za fa. No miore la situazion se si cîr sul canâl di youtube de Regjon, dulà che no si ‘nt cjate un in marilenghe.
PAN E SALAM_ Inalore, sperant in alc di plui resint, tocje intivâsi in Google. Si capite tal sît internet di un gjornalist, un ciert Omar Costantini, condutôr di Videoregione e di Telepordenone e diretôr gjenerâl (!) dal sît www.friulitv.net. I argoments a son furlans, ma cun facilitât a tindin a colâ tal «pan e salam». I sei servizis pal telegjornâl a son scrits cuntun talian che spes si inçopede. Une ande scancarade, conclusions moralistichis e frasis sospindudis. No comenti il montaç, par no incagnîsi inmò di plui. Ai confins cul «Stra-coiar»: Miss Friûl e int che e mangje devant dal obietîf, siorutis che no sintin la domande dal gjornalist, vin a pleton. Inalore, fuarce Costantini. Che se no va cul talian, forsit cul furlan, sô marilenghe, e podarès lâ miôr. Il diretôr gjenerâl di Friultv al à smicjât il mieç par chest gjenar di gjornalisim artesanâl. Il web in fonts al domande ancje evasion.
TECNOLOGJIIS_ Il passaç de tecnologjie analogjiche de television tradizionâl viers Internet al slargje il numar dai destinataris, al sbasse i coscj e al favorìs la integrazion fra plui media intun unic «Super media». Une des tecnologjiis pandudis e dopradis e je chê di «Mogulus», un sît che al permet a ognidun di creâsi la sô web tv e di trasmeti in direte. E di inserî cheste piçule television fate di bessôi dentri tal propri sît. Sore nuie. Baste une telecjamare e une conession. Trasmission in direte o riproposizion a cjadene dai servizis za trasmetûts e cjamâts. O varessin cussì cent mil Costantini ator pal Friûl, cu la lôr videocjamarute. E forsit cualchidun in dret al saltarès fûr.
E LA ARLEF?_ In cheste miserie di web tv furlanis, sierìn cui videos postâts de ARLeF. Spiâ par crodi: trê «messaçs», dulà che si cjatin i salûts dal president, une descrizion de agjenzie e un contribût su la situazion socio economiche atuâl. Insome, se a mostravin i uficis de agjenzie pluitost che il monolic dal president, forsit la robe e sarès stade plui interessante. E po, cu la bandiere dal Friûl aes spalis, l’efiet al jere chel di une «preson dal popul», plui che di un ent public. Vivarosetât, cjare ARLeF.
OSCAR PUNTEL