Sfuei Mensîl Furlan Indipendent
Archivi de Patrie

TERITORI – AUSTRIE. I pompîrs volontaris: l’element plui impuartant par garantî la sigurece de int ancje tai paisuts dispartâts

............

Il gno bisavon, nassût ancjemò sot de Austrie di Francesc Josef, al à simpri fevelât braurôs des decorazions di onôr cjapadis dilunc la sô partignince al cuarp dai Vigjii dal Fûc volontaris. Cheste tradizion todescje e austriache, si è mantignude fin vuê in Slovenie e ancje in chês altris regjons che a jerin tal vieri imperi. Vuê, in dute la Austrie plui di 300 mil oms e feminis si cjatin tes riis di cheste organizazion. Ancje intai paîs austriacs plui piçui, tant che tal gno che al à sîscent abitants, e je une unitât cun dut il necessari. Par chest motîf, i abitants a inmanein diviersis azions par tirâ dongje i bêçs, par fâ sù une cjase gnove, par comprâ machinis; e plui che obligatorie e je la fieste che si organize almancul une volte ad an: dispès al è propit chest l’event culturâl plui impuartant. Si cjapin sù bielis sumis, se al covente ancje plui voltis ad an. E je forsit la organizazion volontarie plui visibile e plui cognossude, cussì nol è nuie di strani che la plui biele cjase dongje de glesie al sedi propit l’edifici dai pompîrs. Chescj cuarps, dulà che ducj i membris a lavorin sore nuie e libars, a son l’element plui impuartant, massime tai paîs dispartâts, par garantî la sigurece de int. La lôr fondazion e va indaûr ai agns Sessante dal Votcent: la prime associazion (Freiwillige Bürgerwehr) sul teritori Austroongjarês e fo implantade za tal lontan 1851 dal uficiâl in pension Ferdinand Leitenberger, a Reichstadt (vuê e je la localitât ceche di Zákupy); sîs agns daspò, tal 1857, e fo metude sù sul teritori de Austrie di vuê, a Innsbruck.
Tal principi a jerin lis associazions di gjinastiche che a jerin istruidis a batisi cuintri il fûc. I ecuipagjaments di chel timp no jerin automatizâts: par metiju in funzion al bisugnave vê avonde fuarce tai muscui.
La idee di volontariât e gjoldeve di simpri plui popolaritât: za tal 1900 o contizavin in Austrie 2.677 cuarps volontaris (vuê a son 4.527), però dome sîs unitâts professionistis che a operavin intai cjâf lûcs. Interessant che za tal 1685 a vevin impastanât une difese cuintri il fûc cun cuatri Feuerknechte professioniscj: chei a jerin i prins Vigjii dal fûc professioniscj dal mont.
Janez Erat

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +