Pre Meni Zannier al presente la sô ultime opare leterarie e cun chê nol mole di stiçâ i furlans sul cantin de autonomie

Cuntun incuintri in Provincie di Udin, e je stade presentade la ultime opare di pre Meni Zannier, di seguit la nestre recension dal libri. Vie pe cunvigne i è stade consegnade la Medaie di Arint de Provincie di Udin pai siei merits. «Un omaç dovût» lu à definît il president dal Ent Pieri Fontanini. Pre Zannier nol è dome un grant poete (al fo ancje candidât al Nobel pe leterature), ma un inteletuâl furlanist ferbint: tai ultimps timps al è stât fra i prins firmataris dal apel pal referendum pe costituzion des dôs provinciis autonomis Friûl e Triest (che o fevelìn a pagjine 3) e vie pal incuintri in Provincie al à marcade ancje la sô contrarietât ae riforme des autonomiis locâls che e scancele lis provinciis par creâ lis Uti. (Redazion)
✽ ✽ ✽
Domenico Zannier, Cjavêi di lûs, capelli di luce, Tavagnà 2015
“Un popul al è un Popul, se cušsient / dal so presint, dal timp, lât e futûr, / se vîf ricuart di Fede e di persones / che j àn rindût onôr e fat civîl, / s’al à une lenghe sô par contâ l’anime, / s’al sa disvolucˇ âsi cun volucˇ / ni pierdi mai misure d’intelet. / Plui che popul al è, se il cjâf nol plèe”
Al è l’incipit de ultime fadie di Domeni Zannier, il poete furlan salacor plui prolific. Che al complete chest so cjapiel cun sîs viers in latin che i dan un ton di solenitât ae opare e a preparin il letôr a ce che lu spiete.
In efiets, pre Meni al à insiorade la leteradure furlane di poemis, di oparis epichis narativis, di drams, tragjediis, romançs, lirichis. Al à insumis tocjât ducj i gjenars leteraris che a une lenghe i coventin par sei une vere lenghe.
Ancje chescj Cjavei di lûs no scherçin. Si trate di scuasi dodis mil viers undisnaris (tant par dî, la Divine Comedie di Dant e rive a cirche cutuardis mil), dividûts in dodis cernetis, ognidune nomenade cul non di une piere preziose (diamants, rubins, turchês, smeralts, zafîrs, labastris, ametistis, jadis, ambris, corai, aghitis, opâi).
Al ven fûr un libri di passe cinccent paginis, dutis di poesie, fûr che cuatri di riflessions introdutivis e dôs di normis di leture e di grafie (l’autôr nol dopre la grafie normalizade, che di jê al à une opinion pluitost negative).
Dôs robis a dan tal voli dal letôr: la facilitât dal viers, che al cor vie sigûr cence fature e che al tocje la perfezion metriche e prosodiche.