La crisi dai ultins agns e à acentuât ancje chi di nô in Friûl problematichis e disparitât, par altri za esistentis, tra oms e feminis

La pierdite dai puescj di vore e à fat damp di plui a lis feminis. Lis paiis si son ribassadis ancjemò di plui rispiet a chês dai coleghis oms. L’ecuilibri, za precari, tra vite familiâr e lavôr al è deventât ancjemò plui fragjil. La precarietât intai rapuarts di lavôr e je a nivei record. Dut chest al à otignût ancje il risultât negatîf di un ritîr “spontani” di tantis feminis dal marcjât dal lavôr.
Tantis, masse feminis, viodudis lis paiis pardabon miserabilis e lis discriminazions, a àn decidût di fâsi di bande par stâur daûr ai propris fîs e ai anzians no autosuficients che a àn in famee.
In Friûl-Vignesie Julie, tra il 2011 e il 2013, lis dimissions di neu maris, validadis des Direzions Teritoriâls dal Lavôr, a son stadis 1.625 cuintri dome 5 paris. E la robe e continue…
Ancje in Regjon lis feminis a pain il cont plui salât ae crisi.
NUMARS ISTAT In Friûl-VJ, di fat, lis feminis disocupadis, stant ai dâts Istat, a son in cressi. Il tas di ocupazion feminine al è calât ancjemò di plui, dal 55,8% al 54,8%, e il tas di disocupazion feminine si ateste al 10,3%.
Secont cierts studis increditâts, un numar plui grant di feminis ocupadis al varès un impat une vore positîf su la produzion di ricjece, sul famôs Pil. A nivel nazionâl, par esempli, 100 mil feminis ocupadis lu aumentaressin dal 0,3% e se lis feminis impleadis a fossin tantis dai oms, il Pil al aumentarès fintremai dal 13%.
Si à di impegnâsi, ancje in Friûl, par che aes feminis a sedin ricognossudis lis stessis oportunitâts economichis, sociâls e politichis e par che a vegnin ricognossudis pussibilitâts efetivis di conciliazion di timps e spazis di vite e di lavôr. In chest cjamp, la contratazion di secont nivel, duncje aziendâl e teritoriâl, e pues pardabon fâ tant par definî struments concrets di conciliazion vere, di flessibilitât orarie e di timp parziâl.
TIMP PARZIÂL Il timp parziâl al ven definît di tancj un orari “feminin”. In efiets, ancje in Friûl-Vignesie Julie la cuote di feminis dipendentis che a doprin il timp parziâl e je dal 35,5%, intant che i masclis a son dome il 5-6%. Ma la domande che si à di fâsi e je: il timp parziâl isal dut volontari, “family frendly” e reversibil? Magari cussì no, nol è cussì. Tancj timps parziâi, intes impresis privadis, a son imponûts par efiet de crisi cun impats pesants sul redit familiâr.
IL PROBLEME DAI FÎS Al va zontât che i servizis ufierts pe prime infanzie (asîl nît, braçule) a àn coscj masse alts par tantis fameis. I fruts di 0 a 2 agns che a frecuentin un asîl nît a son, inte nestre Regjon, il 18,2% e in Emilie Romagne il 24,4%. Nus vûl une conciliazion efetive dal lavôr cu la cure dai fîs e une flessibilitât plui grande dal congjêt parentâl. Ancje par curâ i familiârs disabii o no autosuficients. Che si fasin sieltis politichis e sociâls necessariis che a promovin la jentrade de femine intal marcjât dal lavôr e di chel altri a tutelin la famee, ben masse preziôs par disgregâlu.
Al à di jessi finalmentri valorizât chel grant serbatori di impegn e di talent propri des feminis.❚
Renata Della Ricca, responsabile dal Coordenament Feminis USR CISL Friûl-Vignesie Julie