Il piçul produtôr: «Nissun panic, anzit la ocasion par marcâ miôr la nestre cualitât»

O vin domandât – tant par vê la vôs di un che al sa di ce che si fevele – a Sebastiano Crivellaro, afinadôr di formadis di malghe di alte cualitât, che al lavore fra Sauris e Fors Disore, ce che al pense de cuistion. La sô opinion e je ben clare.
“Dopo che e je jessude la notizie, ogni dì cualchidun in negozi mi domande de cuistion, al vûl sintîsi dî che i nestri formadis a restaran compagns” nus conte. “E jo no rivi a capî la reson di chest panic. Anzit, par me e pues jessi la ocasion di marcâ ancjemò miôr la diference tra prodots di cualitât e robe industriâl. Invezit che inrabiâsi, cheste e sarès la ocasion par pretindi ancjemò plui clarece su lis etichetis e spiegâ a la int che cuant che si compre e vûl fate chê piçule fadie di informâsi ben su ce che si met tal carel. Tant pai formadis talians a son i dissiplinârs: nol esist un Parmigiano fat cul lat in polvar. A pat di comprâ propit “Parmigiano” e no un “plui o mancul”. Ma chel al sta al cjâf di cui che al compre”.
“Dut câs” – al zonte – “se si à tante pôre dai mateçs de industrie, la soluzion e je facile: baste selezionâ piçui produtôrs locâi, che a lavorin piçulis cuantitâts e tu ju âs dongje e si viôt cemût che a lavorin. Che se si compre ben, di cualitât, su rapuarts di fiducie, e si jude la economie locâl o sin ducj plui contents, UE o no…”. ❚
✒ M.T.