Sfuei Mensîl Furlan Indipendent
Archivi de Patrie

Turisim e albiercs difondûts in mont

............

✽ Un flum di milions di euros, deviât in mil riui. Ma, in struc, sono coventâts? Sono rivâts a gjenerâ gnove economie? Domandis che si fasin un tic ducj cjalant i câs che a tegnin bot sul teritori de mont e no dome. La cuistion dai Albiercs difondûts, chê dai consorzis turistics tant che Carnia Welcome o societâts tant che Euroleader a stan fasint discuti e inrabiâ un grum di int. O stin fevelant di ents beneficiaris di une schirie di contribûts regjonâi, stanziaments nazionâi e finanziaments europeans che tai ultins dîs agns a son lâts par ristruturazions, gnovis costruzions, manifestazions, promozions. Tancj di chei bêçs che si fâs fadie a contâju ducj. Tachìn par esempli dai Albiercs difondûts, cheste tipologjie di ricetivitât nassude propit tes monts de Cjargne dopo il taramot su idee di Leonardo Zanier che a Maranzanis di Comelians al veve tacât a pensâ a un sisteme par recuperâ lis tantis cjasis lassadis bandonadis. Ae fin dai agns 90 si rive insom ai prins progjets, lis primis leçs e chescj albiercs a scomencin a vierzi lis lôr puartis…Sauris, Comelians, Sudri.
I NUMARS_ Il concet al è sempliç: il comun al met adun i privâts che a àn cjasis che si podaressin ristruturâ, al presente un progjet ai uficis di Triest, al partecipe al bant e se lu vinç al permet ai proprietaris di tirâ fin al 50% de spese sostignude pai lavôrs, cul vincul però che la cjase comedade e resti par almancul dîs agns al servizi dai turiscj. Tal 2006 a son cinc chei in vore par cuasi 500 puescj jet, 1.500 rivadis, 8 mil presincis e un tas di ocupazion des cjamaris dal 5,2% (“rivadis”: numar di clients, “presincis”: lis gnots che a son restâts ndr). Il model duncje al somearès rezi, la Regjon e continue a invistî, si preparin altris bants pe creazion di gnovis struturis e pal consolidament di chês esistentis. Di Forgjarie a Tarvis, di Claut a Paluce al è dut un moviment. E cussì si rive in dì di vuê a 20 Albiercs difondûts, cuasi 1.700 puescj jet e turiscj che ae fin dal 2014 a àn passât lis 43.700 presincis. Trops bêçs sono stâts spindûts? Intune cunvigne dal mês di Març promovude de Regjon a son stâts fats i conts: 23,7 milions di euros rivâts de Union Europeane plui centenârs di miârs di euros zontâts ogni an de Regjon pes Cooperativis di gjestion des struturis.
I PROBLEMIS_ E chi a tachin lis pucis. Lassant di bande lis polemics leadis ae inoportunitât che conseîrs regjonâi a sedin stâts presidents di cooperativis che a àn usufruît des palanchis de Regjon… Ma, cemût che si domande la int, va ben il contribût che al covente di incentîf a comedâ lis cjasis (e che al permet di fa zirâ la edilizie e l’artesanât…) però o sin intun mont dulà che il libar marcjât al dovarès regolâ il zûc. Cussì come che i albiercs tradizionâi a scuegnin sierâ i conts ae fin dal an cui unics provents de lôr ativitât, ancje pes cooperativis dai Albiercs difondûts al à di valê il stes principi. Invezit, an dopo an, par taponâ lis busis di belanç a son rivâts i jutoris de Regjon. E mighe gjugjulis. Disparitât di tratament che un grum di operadôrs turistics no sopuartin plui.
TAS DI OCUPAZION BAS_ Se a dut chest o zontìn il fat che il tas di ocupazion des cjamaris dopo un aument tal bieni 2007-2008 (ator dal 10%), al è tornât a calâ fin al 6% l’an passât, si pues intuî che forsit il zûc nol vâl masse la cjandele. E no stin a dismenteâsi che no dutis lis cjasis comedadis a continuin a ospitâ i turiscj. Cualchidun dai privâts, finît il vincul, lis dopre pai siei comuts.
Ma beçons, come che o disevin prime, a son rivâts ancje a altris ents dal teritori clamâts a fâ politichis turistichis par fâ cressi la economie dal teritori. Events, promozions, publicitât che dal sigûr a son coventâts par puartâ int, animâ i paîs, fâ cognossi la mont. Però ancje chi al tocje vê un control, elements che a testin la validitât di ce che al è stât fat e il rindiment dal invistiment. Un su dut al pues testemoneâ a favôr o cuintri: il dât des presincis turistichis tal teritori. Ce disial? Tal 2006 tra Cjargne e Tarvisian a jerin stadis 235 mil rivadis e plui di un milion e dusinte presincis. Tal 2014? 195 mil rivadis (mancul 17%) e 626 mil presincis (mancul 47%). O podìn tirâ in bal la crisi, il maltimp, dut ce che o volês. Al reste il fat che i conts no tornin propit… ❚
David Zanirato

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +