Mediocredito e Bancje di Cividât, ce che al è sucedût e lis prospetivis pal futûr dal mont dal credit furlan

Intes ultimis setemanis, il mont dal credit regjonâl si è fat fûr di gnûf cun prepotence ae ribalte des cronichis regjonâls. Protagoniscj, la Bancje Popolâr di Cividât – che la sô assemblee e à “taramotât” i vertiçs, cul defenestrament di Graziano Tilatti e la elezion sucessive de gnove presidente Michela Dal Piero – e il Mediocredito dal FVG, che par chel, dopo lis audizions in Regjon, e je vignude fûr la prevision di altris pierditis intal bieni prossim. Des dôs situazions, dal sigûr la piês e je la seconde, o sedi chê dal Mediocredito e no dome pai incais e pes soferencis, ma ancje parcè che – e je opinion difondude tra cui che al fâs bancje di tancj agns – in timps di tas bas e di spread ridots, un istitût che al rigjave la plui part dal so valôr zontât de intermediazion, dificilmentri al pues sperâ di otignî grancj utii, a plui reson se al è “saornât” des pierditis e di credits dificii di recuperâ. Il Mediocredito – al à za anunziât l’assessôr regjonâl aes Financis Perone, al sarès ae ricercje di gnûfs partners. Ma al è forsit dome se si darà une gnove “mission”, ampliant lis propriis ufiertis sul front operatîf, che al podarà deventâ di aiût – e no di pês (che si viodi la ricapitalizazion resinte…) – ae economie regjonâl intal so complès.
A Cividât al è lât invezit in sene il rinovament dal Cda. Il president che al va fûr, Graziano Tilatti, si è viodût ricognossi de assemblee il lavôr fat in chest an di gjestion de “transizion” dopo la ete di Lorenzo Pelizzo, cuntun belanç tornât une vore in util, ma al à viodût ancje bolâ la proprie candidature a lâ indevant a vuidâ la bancje cividine. Colpe ancje – stant ai “si dîs” – di un lavôr no propit di scuadre cul conseîr cividin Guglielmo Pelizzo, nevôt dal ex president, che al varès vût – simpri stant ai “si dîs”- di judâlu in cheste imprese. Ma intal cont a van metudis ancje ciertis sieltis “impopolârs” di Tilatti in materie di risanament dai conts e une gjestion dai rapuarts cui podês “fuarts” no simpri “intonâts”. Fat al sta che Tilatti e la sô cuardade a àn rimedeade une bolade sonore e Michela Dal Piero – comercialiste udinese, ex assessore aes Financis tal timp de Zonte Illy  “complice” la poie de cuardade dai dipendents, e je la gnove presidente de Bancje Popolâr di Cividât. E eredite une situazion invidiabile dal pont di viste finanziari, ma no sigûr di chel societari, almancul par chel che si à vivût intal ultin periodi. E, soredut, pes reazions imediadis che a son vignudis daûr al risultât des elezions de assemblee, cu la solidarietât imediade di Cna, coltivadôrs e Confartesanât al Tilatti “defenestrât”: “O contìn masse pôc” – al à dit Nello Coppeto, president de Cna udinese, e chest za al è un sintom dal discomut che la imprese artesane e vîf vuê, par di plui cuntune Dal Piero presidente che e je “pupile” dal ex president di Mediocredito FVG Massimo Paniccia (e ancjemò president de Fondazion Cr Triest), che tra l’altri al è ae vuide de Confapi locâl.
In gracie ancje des acuisizions fatis intai agns de gjestion Pelizzo-Di Bernardo – su ducj il 5,26% dal Istitût centrâl des Bancjis popolârs, chel Icbpi ce che al va cumò in vendite par un impuart superiôr ai 2 miliarts di euros, ma ancje lis obligazions cuistadis cuant che il spread al jere ai nivei massims – la Popolâr di Cividât e à la pussibilitât di fâ bogns belançs ancjemò par cualchi an, di là des aleancis che – cemût che al vûl fâ ancje il Mediocredito FVG – e rivarà a meti a pont. Ma al è forsit plui urgjent cjatâ fûr une armonie interne (cinc membris dal Cda a son in scjadince l’an prossim e se si è rivâts a Del Piero presidente cuntune votazion cuasi unanime no bisugne dismenteâ che il Consei al jere rivât crevât al appuntament e che tra i gnûfs elets al è un ex diretôr gjenerâl che nol jere preseât di cualchi membri dai Cda, cussì tant che chel atuâl nol gjoldeve – si dîs – dai favôrs de gnove presidente) e cu lis categoriis, massime chês che a rapresentin lis impresis artesanis che son la anime de economie furlane. Di un futûr inciert de Cividât al à ce pierdi dut il Friûl; la Regjon, invezit, e je ore che e meti man sul seri al ripensament dal Mediocredito e dal so rûl par evitâ altris straçariis – tant che la ricapitalizazion resinte – che i citadins no si puedin plui permeti e che a gjavin risorsis vuê ancjemò plui preziosis al disvilup dal teritori.❚
Linux