Sfuei Mensîl Furlan Indipendent
Archivi de Patrie

ZODIAC FURLAN. Taur

............

TAUR
Nassûts fra i 21 di Avrîl e i 20 di Mai
Segn di Tiere
(come ducj i segns furlans, e no tiere cualsisei, ma propit tiere di cjamp, magari di blave)
–––
Metal fortunât: Il ram (e no ram cualsisei, ma dome chel de cjalderie de polente, e se al è plen di polente al è ancjemò plui fortunât)
Daûr l’oroscop tradizionâl, chei nassûts sot dal segn dal taur a son plens di voie di gjoldi, a stan daûr dal plasê, dai biei vistîs, de biele vite. Intune peraule: a son triestins.
Dutis monadis, naturalmentri, se il taur al è furlan.
Il taur furlan, nol covente dîlu, al è chel che al tire la vuarzine, che al fâs fadie, che al lavore sot dal soreli par fâ vignî sù la blave. Il plui furlan di ducj i segns zodiacâi. Cussì furlan che ancje di piçul, il lat lu preferive sot forme di Montâs, o miôr ancjemò di frico. Cussì furlan che la prime tabeline che al à imparade a memorie e je stade chê dal un par doi. Cussì furlan che i straordenaris par lui a son la robe plui ordenarie di chest mont.
Par chestis carateristichis, il taur al è une vore preseât in dut il Friûl, ancje se il so caratar nol è propite di aur. Cuant che si rabie, il taur al viôt ros, al sofle e al bat i pîts, ma ancje se al mostre i cuars, dentri vie al è bon come une fete di pan cul salam.
No cate dute chê grinte, però, in amôr il taur si lasse meti in bande de sô femine: si sa che in Friûl la vacje e je une bestie sacre. No sacre come in Indie, che no si pues mangjâ, ma sacre par vie  che cence vacje nuie lat, cence lat nuie formadi.
Cussì, dispès il taur al vîf un pôc te ombre dal partner, plui famôs, ma dome se al è bon di preparâ un bon frico.
Daspò che i tratôrs a àn rimplaçade la vuarzine tradizionâl, mandade indevant des bestiis, il taur al è un pôc difident cu lis machinis, par pôre che i gjavin altri lavôr. Par chel, si lu viôt dispès a fâ i conts e a scrivi a man, cence doprâ calcoladoris e computer. Par svicinâlu ae tecnologjie, provait a  spiegâi che i computer si rompin e a coventin comedâts. La voie di mateâ e comedâ e mandarà vie la pôre di no fâ masse.

Vacancis
. Di Istât, lait vie di cjase: o starês ben in malghe. Dut câs, se us invidin a fâ un viaç in Spagne, no stait a lâ a viodi une coride, no si sa mai.
Un consei. Stait lontans di Corgnûi tor Avost. E se propit o vês voie di lâ, almancul viodêt di jessi sigûrs di stâ de bande juste dal bancon de sagre.❚
Bete di Spere

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +