I Sindics dal Laboratori di Autonomie a presentin la “Cjarte di Merêt”

No si fermin i sindics dal “Laboratoi di Autonomie”: aromai a son un flum in plene, e chest gnûf ativisim al lasse ben sperâ ducj chei che a crodin inte necessitât di metisi dongje par fâ valê i interès dal popul furlan e difindi a dimplen la specialitât de nestre Regjon. A àn sielt la date de Fieste de Patrie, che e je stade fate buine ancje dal consei regjonâl tant che fieste uficiâl jenfri polemichis pardabon vergognosis, par presentâ il Manifest dal Laboratori di Autonomie (clamât zaromai “la Cjarte di Merêt” parcè che al è culì che al è nassût): ma non si son fermâts alì. A àn cjapade lA ocasion par presentâ il prossim cicli des Lezions di Autonomie che a vignaran replicadis za a partî dopo la biele esperience dal an passât, e a àn ancje anunciât la convocazion de Assemblee des Comunitâts di lenghe furlane che e je stade previodude inte suaze de gnove riforme dai ents locâi. No stan a spietâ che la Regjon e convochi (il 32 di Mai dal milnufcentnosai) chest orghin consultîf, ma a sburtin dal bàs pe sô costituzion. A son za in viaç i modui e lis richiestis che i sindics di dut il Friûl a saran invidâts a jemplâ par meti in vore lis convenzions che a pandin la volontât di inviâ cheste assemblee strategjiche pal avignì de nestre tiere.
Intun Friûl dulà che lis Provinciis a laran a disparî cheste gnove istituzion e sarà difat la Cjamare di rapresentance (volontarie, no paiade, ma par sigûr une vore “pesante”) che e fasarà capî a Triest e a Rome cuai che a son i orientaments che a saran di intindi, in definitive, come chei de interie comunitât lenghistiche furlane che e je fate, secont lis ultimis ricercjis sociolenghistichis, almancul di mieç milion di personis. A coventaran un pôcs di mês par inviâ cheste Assemblee, ma e po deventâ l’imprest just par valorizâ i teritoris e, cundiplui, par tutelâ la marilenghe difindude (su la cjarte) intal articul 6 de Costituzion, ma lassade muri inte societât e intes istituzions.
Ce modalitât operative podaressie ve cheste gnove realtât istituzionâl? “Al è clâr – al spieghe Diego Navarria, sindic di Cjarlins, che al è un dai 16 fautôrs dal Laboratori – che dome un lûc di condivision al pues fâ cressi lis identitâts des nestris comunitâts e dâur cussience de storie e de culture che a an in comun”. I furlans, di çampe o di drete, a podaressin cjatâ in cheste Assemblee un pont di riferiment par capî miôr cemût mantignî o rinfuarçâ la coesion sociâl sui teritoris. “O domandarìn a ducj i sindics dai Comuns furlans, soredut a chei dai cjâflucs come Udine, Pordenon e Gurize, di aderî ae assemblee che e coventarà a esaminâ ducj i progjets di leç regjonâi e i schemis di ats gjenerâi su lis minorancis”, previodûts des normativis europeanis, de Costituzion e des altris fonts di legjislazion. La consultazion des Assembleis di comunitât lenghistiche e sarà obbligatorie, e chest al sarà un pàs di trasparence une vore impuartant. Par chest a coventin ancje lis citâts dal nestri teritori.
Spietant che e partissi cheste realtât, i sindics a àn za puartat indevant une altre idee fondante di une gnove concezion di specialitât: otignî la competence primarie su la scuele. A àn pandude cheste voie ae presidente de Regjon Debora Serracchiani che su chest teme no ur à sierât la puarte in muse: la robe e va studiade, ma si pues fevelâ di une azion cul guvier in propuesit. Intant però la atenzion dai sindics e je orientade su altris terens: “nus preocupe la gjestion de aghe e ancje la situazion dal Credit Cooperatîf in Regjon e podarès vê aspiets di frontâ par difindi la nestre economie”. No dome: “o stin fasint di dut – al siere Navarria – par cunvinci i Comuns che a scrivaran i Statûts des gnovis Uti a scrivi neri su blanc metodis di condivision des decisions e di partecipazion dai citadins. Dome cussì si tornarà a une autonomie che e partìs dal bas”. ❚
Walter Tomada