La crisi e je l’argoment che si discut plui intai media (gjornâi, televisions, radio e v.i.), intai bars devant di une cjicare di cafè e ancje dilunc dai gustâs e des cenis a cjase proprie.
Un dai setôrs che al à patît di plui, che al è stât colpît in maniere pesante, al è chel de edilizie. Lu dimostrin i dâts ma soredut la realtât.
I doi indicadôrs principâi che nus judin a capî miôr a son: l’Ent Bilaterâl de Casse Edîl di Udin al certifiche l’enesim câl dai assegnâts, e e je calade la presince des gruis in zîr pes nestris citâts e i nestris paîs, a pet di un passât resint là che si podevin viodi un pôc dapardut.
Une vore a son i articui e i intervents su la stampe che a descrivin il stât des robis e al è di podê auspicâ che chest al vedi fat rifleti la politiche, sedi regjonâl che nazionâl.
Cence nissune polemiche e cence ripuartâ numars frêts e percentuâi o ten, però, a esprimi cualchi mê considerazion.
Chest parcè che o soi impegnât ogni dì inte gjestion di situazions aziendâls dificilis che si convertissin in discomut sociâl e in problemis concrets dramatics di singui lavoradôrs e des lôr fameis.
Di cinc agns o ai il rûl di operadôr sindicâl de Filca CISL, e no ai fat altri che gjestî situazions brutis, discutint cuasi in maniere esclusive di amortizadôrs sociâi, di licenziaments, di gjestion dal soreplui di impleâts tal lavôr, e di intarts intai paiaments des retribuzions. O ai vût pardabon pocjis ocasions par contratâ intes impresis acuardis sui premis di risultât aziendâi.
Nol covente jessi economiscj par savê che la edilizie e je un setôr che al tire, stant che al cree un indot tant ampli. La cjase, di fat, di là di jessi costruide e/o ristruturade e va, par esempli, ancje aparade.
A son impuartants i invistiments publics ma bessôi no bastin, stant che lis risorsis a son cetant limitadis. E va rilançade la edilizie residenziâl (soredut la sô ristruturazion) e il sisteme dal credit al à di concedi di plui aes impresis che no rivin plui a sostignî i intarts intai incàs, che si trati di ents publics, aziendis privadis o fameis.
A van continuadis e cressudis lis detrazions fiscâls pes ristruturazions e il sparagn energjetic cul obietîf di creâ, ancjemò plui che intal passât, lavôr. Cun di plui, al va fat in mût che la burocrazie che cumò e ingrivie une situazion za dificile e sedi sveltide.
Al è ancje necessari che lis autoritâts di vigjilance e control e i uficis ispetîfs a garantissin il rispiet des regulis. Chest, a tutele sedi des impresis che a sofrissin di une concorence sleâl che a tutele, dal sigûr, dai lavoradôrs che se di no a saressin iregolârs e sotpaiâts.
Siet agns indaûr, in provincie di Udin, si contavin da siet ai nûf mil edîi. La Casse Edîl vuê e certifiche cuatri mil edîi ocupâts. Chest, par altri, al è un numar destinât a calâ ancjemò di plui, stant che no son previodûts in curt mioraments di nissun gjenar.
Al è, duncje, un pericul concret di dispierdi chês professionalitâts necessariis in prevision di un futûr che al sedi miôr dal nestri presint.
La stragrande maiorance des impresis edîls, inte nestre provincie, a son di dimensions piçulis e mediis, a dan lavôr di cinc a trente di lôr, e al è ancje par chest che al covente incentivâ propit intervents di ristruturazion dal patrimoni abitatîf.
Chescj “piçui” ma cualificâts intervents, a son propit il core business di chestis impresis.
Intun passât ancje masse resint si è costruît masse e ancje mâl. Chest al è dimostrât dal numar di edificis no vendûts e no abitâts. Ve parcè che une riprese dal setôr e passe par fuarce traviers il rifasiment dai edificis publics e privâts par fâju plui sigûrs e mancul energjivars.
O soi convint che, magari cussì no, no si sedi tocjât ancjemò il fonts, ma o soi ancje convint in maniere ferme che a esistin lis capacitâts, la voie, la fuarce e la braùre par lâ fûr di chest brut moment. O vin di partî dal teritori e dal piçul. O vin di agjî cun responsabilitât e cautele, fasint atenzion di no ripeti erôrs dal passât.
Une cjase e va costruide des fondis e no dal cuviert. Par vê une grande cjase a coventin fondis sanis e saldis. O scugnìn, lu ripet, partî dal piçul dal teritori par costruî un futûr miôr e sostignibil. ❚
✒ Admir Musliju – FILCA CISL Friuli V.G.J.
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +