Sfuei Mensîl Furlan Indipendent
Archivi de Patrie

Finance e politiche, un rapuart simpri sul ôr dal conflit di interès (no chei bancjaris…)

............

La seade de bande de agjenzie di rating Fitch dal Mediocredito dal F-VJ e à dât il vie no dome a une schirie di polemichis ma al somee che e puedi discjadenâ une reazion a cjadene che e podarès vê efiets ancje sul sisteme bancjari furlan.
Ma anìn cun ordin. A metât di Març, la agjenzie di valutazion che la Regjon (intune cun Standard’s & Poors) intal Avost 2014 i à rimetût par altri il servizi di rating di cuintripart pal periodi 2014-2016, e à declassât il rating dal Mediocredito di BBB+ a B, o sedi e à fat “sbrissâ” la valutazion de bancje partecipade de Regjon – che e deten plui dal dal 50% dal capitâl – di societât di dimensions mediis dal andament sodisfasint, e duncje in dut câs “racomandabile” pai invistidôrs, a une sorte di titul a risi. In pratiche, Fitch al lasse intindi i propris dubis su lis pussibilitâts di margjin de Regjon tal câs che l’istitût – che al à a pene fate une operazion di ricapitalizazion, riplanant une otantine di milions di pierditis peadis a une serie di invistiments no propit atents (viodûts i risultâts), cualchidun “impuartant” ancje fûr dal Friûl-Vignesie Julie – si cjatàs a vê di frontâ une gnove cundizion di dificoltât; un intervent de Regjon al podarès jessi intindût al limit di chel che al ven configurât tant che “aiût di Stât”, par esempli, intant che a no convinci Fitch e je ancje la cualitât dal atîf di Mediocredito, «lât in piês ancjemò di plui intal 2014, ancje se a un ritmi plui lent» e il stock dai credits deteriorâts,  «vâl a dî un massim dal 32 par cent dai impleis sporcs», intant che a vegnin segnalâts in cressi «i credits deteriorâts ancje intal 2015», ancje se a un ritmi plui lent a front di une reditivitât «storichementri basse» de bancje e di une tornade al util stimât no prime dal 2016/17.
Voltiti mont! Imediadis e disdegnadis lis posizions dal assessôr regjonâl aes Financis, Francesco Perone, che al met sot acuse ancje i criteris che a àn ispirât il judizi di Fitch (che lui stes i à dade la incarghe, par altri) e de presidente di Mediocredito, Cristiana Compagno, che e dîs fûr dai dincj: «Une decision che no ten cont dai risultâts di Mediocredito e che e segne un disalineament fuart tra andament de bancje e valutazion di rating. Une decision inspietade che no condividìn, ni intal merit e nancje inte tempistiche, ma che no comprometarà la implementazion dal plan industriâl che i socis e il Cda a son daûr a puartâ indenant cun indurance. O larìn indevant duncje cu la stesse definizion di vuê par fâ di Mediocredito une bancje corporate a nivel regjonâl a servizi des impresis dal teritori».
Fin chi dut normâl, al è il zûc des parts, si podarès dî. Dulà isal il berdei? Il berdei al sta intal fat che la Regjon e jere daûr a resonâ cui istitûts di credit socis – in particolâr chei locâi – par fâ in mût che si “cjamassin sù” chê part dal capitâl di Mediocredito dal F-VJ no sotscrit de Fondazion CrTrieste e che al à costret la Aministrazion regjonâl a un intervent cetant onerôs intal procès di ricapitalizazion, puartantle par altri a detignî plui dal 50%. Insume, in peraulis puaris, la Bancje Popolâr di Cividât e il sisteme des Bcc regjonâls a saressin clamâts a un sfuarç no indiferent. Il president “traghetadôr” dal istitût cividin, Graziano Tilatti – daûr chel che si dîs – al viodarès cun favôr invezit ancje un coinvolziment di Iccrea, definintle une sorte di holding nazionâl dal sisteme dal credit cooperatîf. E chi, tra lis pretesis de regjon e lis cuintripropuestis dai socis, ve il berdei: parcè che ai 26 di Avrîl i socis de Bancje Popolâr di Cividât a laran in assemblee pe aprovazion dal belanç e pe elezion dal gnûf president. Cuintri il rinovament di Tilatti si è esprimude in Cda Michela Dal Piero, comercialiste e za assessore aes Financis inte Zonte Illy, che la sô posizion e sarès plui dongje di chê dal esecutîf Serracchiani. In dut câs, che e ledi come che e ledi, al è l’enesim “conflit di interès” tra mont de finance e politiche, stant che il risultât al pesarà ancje sui rapuarts cu lis Bcc locâls e il rest dal sisteme. No fasial vignî inniment nuie a di nissun la domande «Alore? Sino parons de bancje?» che e comparìs inte intercetazion famose tra Piero Fassino e Giovanni Consorte, chê volte president di Unipol? ❚
Linux

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +