Simeoni (FF) in difese de specialitât

Al à vût il vôt di ducj i conseîrs provinciâi di Udin l’ordin dal dì proponût dal conseîr Federico Simeoni (Front Furlan) cuintri de ipotesi di disfâ il F-VJ dentri di une macroregjon. Ordin dal dì che il president Pietro Fontanini e il president dal Consei Fabrizio Pitton a trasmetaran al gnûf president de Republiche Sergio Mattarella. Jentrant tal argoment, Simeoni al à marcât il florî di propuestis a nivel talian contrariis aes autonomiis locâls, judicant necessari cjapâ une posizion fuarte di tutele cuintri riformis fuartis che a riscjin di comprometi la specialitât. Andrea Simone Lerussi, conseîr dal Pd, spiegant i motîfs principâi de specialitât dal F-VJ, oltri ae presince des minorancis linguistichis, al à riclamât la gjestion virtuose des risorsis, duncje un model di cualitât aministrative, di federalisim; Gabriele Pitassi (Pd) al à sburtât ducj a difindi in maniere valide la nestre specialitât che Salvatore Spitaleri (cjâf grup dal Pd) al à definît un teme che al sburte viers dal avignî.
“Tra lis 5 realtâts a statût speciâl, la nestre e je chê plui debile” al à comentât Fontanini “Si capissin e si prudelin chês altris ma no chê dal F-VJ che si fonde su la presince di minorancis linguistichis e in particolâr di chê furlane”. Il President, pontant sul art. 6 de Costituzion, si è augurât di vê la poie sedi dal President de Republiche, sedi dal popul furlan. ❚
✒ Redazion