Musis di… Facebook. Par un 2015 cuntun internet plui net, une piçule vuide su cemût protezisi des sflocjis che a zirin su Facebook (e la Rêt)

La Patrie dal Friûl e je presinte ancje su Facebook cuntune sô pagjine. Un imprest par difondi il gjornâl, ma ancje par incuintrâ e dialogâ cui letôrs e cu la int che e baline pal social network. Cheste rubriche e fevele di lôr e di ce che al zire ator par chest “social network”…
✽✽✽
Une des plais di Facebook e di internet in gjenerâl e je chê des notiziis falsis che a zirin simpri di plui, propit pal sisteme di condivision che al à fat grant il “social network” inventât di Mark  Zuckerberg. Un fenonim favorît dal fat che in Rêt si stâ pôc a scrivi e a publicâ robis che a puedin jessi viodudis di ducj, ma duncje ancje si sta pôc a inventâlis. Lis motivazions a son lis plui variis: fâi cuintri a un aversari politic, narcisisim, gust di coionâ chei altris, vê plui “trafic” sul sît, o il cussì clamât “complotisim”. Se si cuince dutis chestis robis cun la ingjenuitât di ducj, si cjatisi devant di un fenonim di une certe gravitât. Atents, par esempli, che su Facebook si pues condividi un articul cambiant su la bacheche il titul o il struc dai contignûts (duncje, simpri lei l’articul origjinâl). Une altre “tecniche” e je citâ o voltâ un articul di un gjornâl forest, che al da simpri ae notizie un alc di “internazionâl” e autorevul; pecjât che a son sîts forescj propit specializâts in sflocjis e, magari cussì no, in cualchi câs a colin te vuate ancje gjornaliscj di grancj gjornâi talians. O pûr si invente di plante fûr une notizie, cun cualchi citazion o riferiment cence provis: in chest câs, se no son i link che a confermin chel che al sta disint l’articul, o podês stâ scuasit sigûrs che a cirin di coionâus. Tal cjamp dai video si pues cjoli dome un toc dal filmât e comentâlu in maniere di ingjanâ, o pûr meti i sottitui che a voltin un discors in lenghe foreste in maniere falade, o adiriture inserî suns o vôs parsore fasintlis passâ par part dal origjinâl.
✽✽✽ LA LISTE NERE
Chei dal sît “Bufale un tanto al chilo” a àn metût ju une liste dai sîts plui inafidabii o che adiriture a son specializâts tal fâ sù falsitâts arudis, te maniere che si fevelave parsore. No us met ju la liste complete, ma cualchi nom di chei che o viôt plui condividûts dai furlans in Rêt: ImolaOggi, VoxNews, Ticino live, AIDAA, Informare per resistere, Vnews24, Attivo Tv… Cuant che o viodês une notizie “di no crodi” che ven di un di chei ca, controlait ben e leiêt dut.
✽✽✽ UN RIMEDI FACIL
Fin dai timps li che a jerin dome lis mail, a son simpri rivadis “cjadenis di Sant Antoni”, par esempli cun domandis di bêçs par cualchi frut malât. Ancje su Facebook, cuant che o viodês une robe cussì, o une notizie che us scaturìs, ma che no vês viodude di nissune bande, fasêt une robe semplice che us puarte vie 10 seconts, ma buine di gjavâus ogni dubi. Cjapait cualchi peraule dal test in cuestion, zontait la peraule “bufala” e fasêt une ricerche su Google: sigûr o cjatarês su internet cualchidun che a ‘nt fevele, disvelant la veretât su la sflocje di turni. Dispès a son robis che a zirin za di agns, come une mode che e torne.
✽✽✽ SÎTS ANTI-SFLOCJE
Come che a son tancj che si impegnin a fâ sù sflocjis, cussì par fortune a son tancj che si impegnin a butâlis jù. Ve chi dome cualchi non.
Paolo Attivissimo (al è il so cognon vêr, us siguri) si pues dî che al è il dean dai “debunker”, come che si clamin tal solit gergo cjapât su dal inglês chei che a scuvierzin falsitâts. Gjornalist svuizar atîf (issim) di agns, autôr ancje di trasmissions par radio, baste fâ il so non e cognon su Google par rivâ al so sît, o pûr cjatâlu su Facebook. “Bufale un tanto al chilo” – che si à fevelât di lôr prime – al è un grup nassût su Facebook che al à ancje un sît: www.butac.it. L’ultin che us nomeni – si cjate ancje chel su Facebook – al è “Bufale su FB” che a àn il sît www.bufale.net/. Ma, come che si diseve, chei ca a son dome cualchidun di lôr: cjatait voaltris il vuestri preferît e magari se prime us capitave di condividi cualchi sflocje, cumò o podaressis condividi link che a contribuissin a vê mancul balis ator pe Rêt. Par un internet… plui net! ❚
Dree Venier