Sfuei Mensîl Furlan Indipendent
Archivi de Patrie

SLOVENIE. Lis fuarcis politichis a cirin l’acuardi su la leç eletorâl

............

Mattarellum, Porcellum, Italicum… Slovenicum. Se in Italie di timp la cuistion de leç eletorâl e je al centri di discussions e polemichis, in Slovenie la situazion no je tant divierse. La leç che e regole lis elezions pal Parlament (chês altris a son chês pal President, pai ents locâi, pal Parlament european e pai referendums) e je in vore dal 1992. Chê volte e jere stade definide une leç transitorie, nassude de dibisugne che e vignìs aprovade intal timp plui curt pussibil dopo la indipendence de Slovenie. Ma fin cumò, 23 agns dopo, lis spietis di cui che si augurave i cambiaments de leç a son stadis simpri delududis. La ultime discussion – slargjade ancje a rapresentants di istituzions, esperts, rapresentants des ONG, e altris puartadôrs di interès, par verificâ lis pussibilitâts di cambiâ la leç – si è tignude a metât Zenâr. Chê precedente, ancjetant inconcludente, e jere stade in Mai, tacade des elezions anticipadis di Lui.
Cumò il Parlament sloven al à 90 membris, elets secont il principi de rapresentance proporzionâl cuntun soiâr di bariere al 4%. Doi seçs a son risiervâts aes comunitâts nazionâls autoctonis taliane e ongjarese, votâts in maniere separade di chei che a fasin part des dôs comunitâts minoritariis cul sisteme maioritari. Il mandât dai parlamentârs al dure cuatri agns. Il cuarp eletorâl al è ripartît in vot circoscrizions che a lôr volte si componin di 11 distrets ognidune. In ogni circoscrizion a vegnin elets 11 deputâts: su la base di cierts justaments, però, no simpri al sucêt che ogni distret al elei un propri rapresentant. I seçs a son assegnâts cun doi conts diviers: inte circoscrizion eletorâl su la base di chel che i disin cuozient Droop, a nivel statâl su la base di chel che i disin metodi D’Hondt. In ogni câs ogni candidât al pues presentâsi dome intun distret mentri che, in teme di rapresentance di gjenar, inte composizion des listis al bisugne tignî cont de cuote minime dal 35% par ognidun dai doi ses.
Dal 2011 a son stadis cjapadis in esam cuatri propuestis di modificazion, ma nissune no à otignût la poie necessarie dai doi tierçs dai parlamentârs. Tra chescj, o citìn chê dai democratics slovens di SDS (partît di centri diestre vuidât di Janez Janša) che a vevin proponût un sisteme maioritari a dopli turni. A Dicembar 2013, dopo un vertiç dai leaders dai partîts parlamentârs cul president de Slovenie Borut Pahor, al jere someât che si podès rivâ a une soluzion condividude. Lis prioritâts che e varès vût di tignî cont la riforme a jerin: une plui fuarte incidence dai eletôrs cu la introduzion dal vôt di preference, il soiâr di bariere al 5% e la eliminazion des circoscrizions eletorâls. La cuistion però e je colade in dismentie, in pratiche fin ae crisi sucessive di guvier.
La ultime propueste in ordin cronologjic e je stade chê de Union des associazions dai pensionâts de Slovenie. E previodeve un sisteme eletorâl combinât là che ogni eletôr al varès esprimût doi vôts, un di preference par un candidât deputât, il secont pal partît o liste cu la pussibilitât di vôt diszontât. La propueste e jere stade firmade di 5.700 eletôrs, ma dopo e je stade depenade de comission parlamentâr pertinente inte Sierade passade.
A vuê, l’unic pont che al met dacuardi lis fuarcis politichis e la opinion publiche al è che la leç e vedi di jessi cambiade o almancul miorade. La propueste che e gjolt dal numar plui alt di consens e je chê che e previôt un sisteme cumbinât, che e podarès jessi anticipade, intant, cu la introduzion dal vôt di preference. Al è clâr che la gnove leç eletorâl o lis sôs modificazions a varessin di otignî un larc consens inte societât civîl e inte politiche. Cence di chest, secont il prin ministri Miro Cerar, al sarès miôr dedicâsi a altris cuistions plui urgjents. ❚
Tjaša Gruden

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +