Une cjadree simpri plui carulade

Dal 2008 o lavori tant che operadore sindicâl intal distret de cjadree. Propit in chel distret une volte siôr e virtuôs clamât “triangul de cjadree”. Mi visi ancjemò cuant che mê mame mi contave de sô esperience di vore, di corieris e corieris che a partivin dai varis paîs de nestre provincie e ancje dal gno paîs di divignince, Pucinie, e des lungjis colonis che si formavin ai semafars, chês che vuê a son tarondis, par rivâ al lûc di lavôr.
Intal 2008 si à scomençât a sintî in mût ancjemò plui pesante la crisi ancje se, in realtât, il setôr de cjadree al à scomençât a cricâ intal 2001. Tant al è vêr che za si jerin doprâts amortizadôrs sociâi tant che la Casse Integrazion Ordenarie, ma cul invît de bande des direzions aziendâls di tignî dut scuindût e segret.
O ai domandât tancj intervents di poie e di assistence ancje pes aziendis artesanis, tant numerosis inte zone e fondamentâls intal sisteme distretuâl par mandâ indenant la produzion. Aziendis, par altri, cence la pussibilitât de cuviertidure di amortizadôrs sociâi.
E je stade une falcidie di licenziaments che, a dut vuê, no si son fermâts. E cetant numerosis che a son lis aziendis che a àn sierât lis antis par vie che a son falidis! Une vore. Masse! Effezeta, Fratelli Costantini, Imex, Ergos export, Forsedia, Idealsedia, e v.i.
Ma dut chest al somee che nol vedi preocupât plui di tant lis istituzions. Ancje lis istituzions locâls no àn fat dut ce che al coventave fâ par che la Regjon si interessàs di plui di cheste situazion grave.
Lis aziendis, par podê restâ sul marcjât, a àn scomençât a diversificâ. Cui che al voleve e al vûl restâ sul marcjât al à puartât la proprie produzion intune fasse di cualitât medi alte, specializant la proprie lavoranzie. Par chês personis che a vevin lavorât par agns e agnorums in lavorazions semplicis e ripetitivis al è stât pardabon problematic tornâ a metisi in zûc. Dut chest, però, al è stât necessari par cjatâ une gnove ocupazion.
La strente creditizie e à agravât la situazion, fasint mancjâ aes aziendis la licuiditât. O soi impegnade cumò intun grant numar di vertencis sindicâls e legâls propit par podê recuperâ lis retribuzions e lis buinis jessudis che a tocjin e che no son mai stadis erogadis.
La robe che plui mi avilìs e je la pesantece de situazion che no fâs traviodi nissune ande di riprese. O sofrìs intal viodi il disconfuart des personis che a cirin dibant un puest di vore, lavôr tant indispensabil inte vite dai singui e des fameis!
A esistin dut câs, par fortune, aziendis di rilêf che a produsin, a invistissin e a dan lavôr ai propris dipendents e ancje ai artesans de zone.
O stimi che al sedi plui che mai necessari pontâ di gnûf i rifletôrs su chê “cjadree” che aromai e criche, par fâle tornâ di gnûf simbul di une virtût produtive tant scjassade di une crisi che e à fat pierdi plui o mancul la metât dai assegnâts al setôr! Al va fat dut il pussibil par costruî un pussibil futûr di lavôr, dant serenitât e prospetive ae nestre int.
Ancje jo, tant che mê mame, un doman o volarès contâ a mê fie une storie fate di lavôr e di benstâ. ❚
Alessia Cisorio Filca, Cisl F-VJ