IL FERÂL. I FURLANS E IL TEMPLI. (otave pontade)

O vin scomençât chest an dal “Ferâl”, la rubriche dedicade a pre Antoni Beline, riproponint une sô riflession a pontadis. Il test complet al à il titul “I Furlans e il templi” e al presente un resonament sul rapuart dai Furlans cu la fede e la religjositât.
***
(otave pontade)
[…]  I FURLANS E IL TEMPLI
Ordin e dissipline
No vin di maraveâsi se la rispueste e je chê che o cognossìn: la Scriture no val nuie cence la tradizion e la interpretazion autentiche dal magjisteri glesiastic e adiriture e passe te liste dai libris proibîts; la gracie no ven di Diu cence la mediazion sacramentâl de glesie; no baste la fede ma e covente la devozion, lis oparis di misericordie, lis indulgjencis e vie; cul batisim tu puedis dome scoltâ, paiâ e tasê, parcè che dut al passe pe gjerarchie che e à lis sôs diramazions ben definidis e struturadis intes diocesis e intes parochiis. E je finide la anarchie, la aprossimazion, il “fâs di bessôl”. Al covente ordin e dissipline, cun ideis pocjis e claris. Par garantî chest ordin e cheste dissipline a vegnin cjapadis dôs decisions fondamentâls: l’oblic pai vescui di lâ a stâ te lôr diocesi, là che par solit a mandavin i lôr vicjaris, e la istituzion dai ‘seminaris, cul intent di preparâ un personâl competent e ubidient.
Semplificant ma no tradint la sostance, si pues dî che cun Trent e ven canonizade chê struturazion che e à cjapât simpri plui pît e che nus à dade la glesie di vuê, là che il magjisteri al determine dut e la int e pues dome ubidî o bandonâ. E nas la ete dai catechisims gjenerâi e universâi che a àn i lôr nons plui emblematics tal gard. gjesuit Robert Bellarmin e tal pape Pio X (Catechismus Romanus, Catechismus ad Parochos, Catechismo della Chiesa Cattolica), là che dut al è clâr e definît, ancje se frêt e cence anime. Se prime si podeve iludisi, almancul cualchidun, di distudâ la sêt lant a bevi aghe frescje te fontane de Scriture, cumò tocje rassegnâsi a lâ a bevi tai cjaldîrs de glesie e il cop lu à il plevan.
Si pues dî che il Concili di Trent al à salvade la struture, e in chest tancj lu considerin providenziâl e une piere miliâr, ma a presit de libertât, de spontaneitât, de creativitât, de anime. Il dirit cjaluni al à cjapât il puest dal Spirit o almancul une impuartance e une primarietât che nol veve e no i competeve, e la regule glesiastiche e à monopolizade la vore salvifiche di Crist. Cul Concili di Trent la glesie une, sante, catoliche e apostoliche e je deventade soredut e prin di dut romane, papâl, gjerarchiche, struturade, standardizade, cul templi e il cult e il sacerdozi in funzion preminente e dibot esclusive. ❚
[…]
(al va indevant sul prossim numar)
pre Antoni Beline