Cemût si votial?

Lis operazions di vôt a scomençaran cul Prin di Otubar, cuant che e sarà completade e metude in funzion la plateforme pal vôt eletronic. Il seç al restarà viert par 30 dîs. Par intant, cui che al vûl informâsi di plui su lis ativitâts dal grop, al pues cjatâ lis ultimis gnovis aes direzions www.plebiscitofriulano.eu e respublicafurlane.blogspot.it.
La modalitât plui pratiche par esprimi il vôt e je che digjitâl: si scugnarà notâsi online e si otignarà un codiç personâl, che in gracie di chest si varà acès ae plateforme. A podaran votâ chei che a son nassûts dentri dal teritori dal Friûl storic: lis provinciis di Udin, Gurize e Pordenon. Fûr, duncje, Triest. Dentri, invezit, Sapade, i comuns dal mandament di Puart, i paîs slovens che storicamentri a jerin part dal Friûl. A podaran esprimisi ancje i furlans tal forest. I organizadôrs a visin che a saran fats precîs controi, par evitâ falsis identitâts o plui regjistrazions. Al è pussibil otignî il codiç ancje traviers i certificadôrs nomenâts dal diretîf, in chel câs si à di contatâ la organizazion traviers de mail che si cjate sul sît. Al sarà pussibil anche votâ intun seç “fisic” ma, tal moment che si va in stampe, no je stade ancjemò sclaride cheste modalitât. Il cuesît su la indipendence dal Friûl al sarà bilengâl: furlan e talian. ❚
O.P.