La Patrie dal Friûl e presente il gnûf libri dai Gnognosaurs… ator pal Friûl cul Messaggero Veneto

Nus al vevin prometût te ultime interviste sul numar di Avost “O viodarês ce che o vin preparât pal Autun…” e, di bogns furlans, a son stâts di peraule.
Dopo un Istât passât a contâ des lôr ‘origjins’ su lis pagjinis dal Messaggero Veneto, ve ca la ultime novitât editoriâl dai Gnognosaurs, che simpri cul cuotidian di viâl Palme, a saran inmò in edicule cun “The Best(iis): lis miôr storiis”, une selezion des plui bielis aventuris dai dinosauruts nassûts dal lapis di Dree Venier.
La jessude e je fissade pai 26 di Setembar e la date no je casuâl: in chê dì come che i nestris letôrs aromai a san, la Europe e celebre la Zornade europeane des lenghis, istituide par ricuardâ la unitât te diviersitât, in chest câs linguistiche, de Union europeane.
Realizât cul contribût de Agjenzie regjonâl pe lenghe furlane che e à decidût di sostignî il progjet, il libri al ven publicât par cont de Clape di Culture Patrie dal Friûl, editôr de nestre riviste.
“Lis origjins” gjavât fûr dal prin volum; “A vore” gjavât fûr dal tierç volum “Gnognowood” e “Lis vacancis ” gjavât fûr dal secont volum a son lis trê contis che a van a compini chest ‘distilât di Gnognos’, compagnât ancje di gnûfs contignûts tant che un struc des regulis par imparâ a lei e a scrivi par furlan.
La prefazion e je di Manuele Fior, il fumetist furlan vincidôr dal premi “Fauve d’Or” al festival di Angoulême in Francie, vâl a dî l’Oscar dai fumuts. I furlans lu àn tacât a cognissi chest an, ospit di “Leggermente” a Sant Denêl, ma La Patrie lu veve bielzà intervistât intal 2011 e Manuele nus à fat chest regâl.
La distribuzion tes ediculis e previôt la presince dal libri su dut il teritori des trê provinciis furlanis, di Gurize a Pordenon, passant clâr par Udin.
“O crodìn une vore in cheste iniziative editoriâl” al comente pre Roman Michelot, president de Patrie “Il lavôr dal Dree Venier al è aromai un classic de leterature par furlan: i siei fumuts a judin a imparâ la nestre lenghe, ancje par cui che nol fevele par furlan. E o vin agrât sedi ae ARLeF che nus ricognossût un finanziament sedi al diretôr dal Messaggero Veneto Omar Monestier che al à acetât chest acuardi che nus permet di rivâ in ogni cjanton dal Friûl, cuntun presince capilâr tes ediculis”.
Si podarà comprâlu par 4 setemanis in abinament cul cuotidian “O conseìn di lâ in edicule e prenotâlu par no restâ cence: la distrubuzion e cjape dut il Friûl e lis copiis a podaressin no bastâ par ducj”.
“O pensìn di rivâ a rindi plui legri chest principi di an scolastic” al siere pre Roman “ma o sin convints che chest librut al zovarà sì ai fruts, ma a dute la famee stant che magari, cu la scuse di judâ fîs o nevôts, gjenitôrs e nonos si cjataran a lei insiemit lis aventuris dai Gnognosaurs”! ❚
Christian Romanini