LA VÔS DE CISL. Cemût corezi la declarazion dai redits

Dopo la presentazion de declarazion dai redits, il contribuent al pues vê bisugne di corezi chel che al à declarât. Par esempli, al pues vê dismenteât di segnâ cierts redits o di scurtâ spesis.
Al è pussibil presentâ il model Unico integratîf dentri dai 30 di Setembar dal an dopo di chel di compilazion de declarazion ordenarie (pai redits dal 2013 la scjadince e je ai 30 di Setembar dal 2015).
La declarazion integrative e pues finî cuntun debit che al larà paiât doprant il model F24, insiemi a sanzions e interès.
Se il contribuent al à presentât il model 730, al pues retificâlu cul 730 integratîf fin ai 25 di Otubar dal an in cors. Però, dome se la declarazion integrative e previôt un rimbors di impueste. E, tant che pal 730 ordenari, al sarà simpri il sostitût di impueste a compensâ il credit in maniere direte te buste paie dal dipendent/pensionât.
Dopo de date dai 25 di Otubar, al sarà simpri pussibil corezi il 730 doprant la metodologjie di prime: Unico integratîf fin ai 30 di Setembar dal 2015.
Se invezit la modificazion al 730 ordenari e gjenere un debit, nol è pussibil elaborâ il model 730 integratîf, ma al larà doprât il model Unico dentri de scjadince dai 30 di Setembar dal an dopo. La impueste in plui dovude in chest câs no vignarà stratignude in buste paie o te pension, ma e sarà paiade in maniere direte dal contribuent doprant il model F24, plui lis sanzions e i interès al tas agjevolât previodûts in câs di raviodiment operôs.
Il raviodiment operôs al è un istitût juridic che al permet al contribuent di regolarizâ in maniere spontanie erôrs fiscâi, paiant il dovût dentri di une date fissade. Il raviodiment al è perfezionât cul viersament contestuâl dai interès pal paiament intardât e di une sanzion limitade, che la sô alicuote e varie su la base dai dîs di intart e dal gjenar di violazion cometude:
– Raviodiment sprint: in câs di intart fin a 14 dîs, la sanzion minime e ven ridote a 1/15 par ogni dì di dilazion dal paiament.
– Raviodiment curt: par intarts fin a 30 dîs, la sanzion e ven ridote a 1/10 dal minim.
– Raviodiment lunc: par intarts superiôrs ai trente dîs, ma dentri dai tiermins di presentazion de declarazion relative al an che e je stade cometude la violazion o, se no je previodude une declarazion, dentri di un an de scjadince dal paiament, la sanzion e ven ridote a 1/8 dal minim.
Par esempli, intal câs di viersament intardât di impuestis, la sanzion minime e je previodude al 30%. Si che duncje, in câs di raviodiment, o varìn chestis sanzions:
– Raviodiment sprint: 0,2% par ogni dì di intart fin al massim di 2,8% intal câs che si pai te decime cuarte dì.
– Raviodiment curt: de decime cuinte dì ae trentesime, la sanzion e sarà al 3%.
– Raviodiment lunc: di là de trentesime dì, la sanzion e passe al 3,75%.. ❚
✒ Marianninna Rocco, Responsabile Fiscâl CAF CISL Udin