Sfuei Mensîl Furlan Indipendent
Archivi de Patrie

SLOVENIE. Alenka Bratušek, prime femine a vuidâ il guvier di Lubiane

............

A doi mês des elezions parlamentârs dai 13 di Lui passâts, la Slovenie e à un gnûf guvier. La scuadre formade dal vincidôr des elezions e gnûf prin ministri sloven, il jurist Miro Cerar, e à otignude la fiducie in Parlament ai 18 di Setembar. Al è il decim secont esecutîf dal Mai dal 1990.
Se la legjislature di prime si è concludude pe prime volte cu la nomine a prin ministri di une femine, Alenka Bratušek, ancje Cerar al à sielt di lâ indevant su la strade de paritât om e femine. Su sedis ministris (doi di chei, cence tacuin), a son di fat siet lis feminis (dât cence precedents) che ur son stâts assegnâts chescj setôrs: sanitât, istruzion, internis, culture, ambient, lavôr, famee e afârs sociâi, disvilup, progjets strategjics e coesion.
A fasin part de coalizion che e sostignarà il gnûf esecutîf, di là dal Partît di Miro Cerar (SMC), ancje i partîts di centri çampe DeSUS (pensionâts) e SD (socialdemocratics) che a àn firmât l’acuardi di guvier ai 8 di Setembar stâts. Dopo i dineis di Nova Slovenija (centri diestre) e Združena levica (çampe radicâl) a jentrâ in maiorance, il gnûf prin ministri al à refudade la colaborazion dal partît de ex prime ministre e cumò candidade a vicepresident de Comission Europeane responsabile de Union energjetiche Alenka Bratušek. Cerar al pues duncje contâ in Parlament suntune maiorance di 52 deputâts (su 90 totâi).
Tra lis variis nominis, fra i ministris, e à fat scjas chê di Goran Klemencˇicˇ , ex president de comission anticoruzion che al vuidarà il dicasteri de Justizie. Klemencˇicˇ, espert di dirit, al è stât segretari di stât al ministeri dai internis, che volte vuidât di Katarina Kresal. Tant che president de comission anticoruzion, al à otignude une grande visibilitât mediatiche pal lanç de aplicazion Supervizor pe trasparence des transazions dai ents publics. Ma soredut pes acusis di coruzion che e à fat a di chel che al jere il prin ministri Janez Janša (po dopo sfiduciât e cumò detignût in preson dopo de condane definitive pe cuistion Patrie) e al sindic di Lubiane e chê volte leader de oposizion Zoran Jankovicˇ.
Chescj, in plui di Klemencˇicˇ, i ministris sielts dal partît dal prin ministri: Jožef Petrovicˇ (economie e tecnologjiis), Milojka Kolar (sanitât), Stanka Setnikar Cankar (istruzion), Peter Gašparšicˇ (infrastruturis), Boris Koprivnikar (aministrazion publiche), Vesna Györkös Žnidar (internis) e Dušan Mramor (financis). Chest ultin, che al à anticipade za une manovre coretive dal belanç pal 2015, al à cuviert la stesse incarghe tra il 2002 e il 2004, cuant che al à preparât la jentrade de Slovenie inte Union Europeane. DeSUS al à otignût invezit cuatri ministris: il leader Karl Erjavec al è stât riconfermât a cjâf dal ministeri dal forest, Gorazd Žmavc al sarà ancjemò il responsabil dai slovens di di là dal confin e intal mont. A Julija Bizjak Mlakar e je stade rimetude la deleghe ae culture, intant che a Irena Majcen chê pal ambient e il teritori. Ai socialdemocratics a son lâts invezit trê ministeris: il leader dal partît Dejan Židan al è cumò ministri de agriculture (cjarie che al à vût za dôs voltis, cjapât dentri l’an di guvier Bratušek), Anja Kopacˇ Mrak e larà indevant cul lavôr tacât a cjâf dal ministeri dal lavôr, famee, afârs sociâi e stessis oportunitâts om e femine, intant che l’ex president dal Parlament sloven Janko Veber al è il gnûf ministri de difese. La maiorance e à istituît ancje l’Ufici pal disvilup, i progjets strategjics e la coesion, che al sarà vuidât dal ministri (cence tacuin) Violeta Bulc.
Intal acuardi di guvier pal cuadrieni prossim, une part dal program e je dedicade ancje ai problemis des minorancis. Pes comunitâts nazionâls taliane e ongjarese (che par leç a elein, ogni, un propri rapresentant in Parlament e che ur ven garantide rapresentance intai comuns dulà che a son insediadis in sens storic) al è previodût un infuartiment dai lôr dirits in ducj i setôrs, tacant de »leç su lis comunitâts nazionâls autoctonis taliane e ongjarese« che e vûl fâ il guvier Cerar. Atenzion particolâr e je dedicade ancje ai slovens che a vivin intai paîs dongje e in altris parts dal mont. Tra i obietîfs, l’infuartiment de cooperazion economiche, la poie al studi de lenghe slovene intai paîs dulà che a stan, e facilitazions pal studi in Slovenie. Dentri de fin dal 2015 e varès di jessi definide la strategjie di colaborazion a lunc tiermin cui slovens intal mont. ❚
Tjaša Gruden

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +