VIERS IL FRIÛL. Dome madracs par Sapade e Sant Michêl

Nuie di fâ. No si sbloche ancjemò la cuistion dal passaç di regjon pai comuns dal Venit che a sburtin viers il Friûl. Tacant di Sapade-Plodn dut al è restât fer ai mês passâts, dal rest la Comission Afârs Costituzionâi dal Senât in chestis setemanis e à altris ce fâ, la riforme dal stes Senât su dut e sta impegnant i senatôrs a 360 grâts. E cussì forsit e larà indenant fint in Autun. Tal paîs dal Cjadovri intant si à ricevût cun plasê la notizie dal referendum on line pe indipendence dal Friûl, che al permetarà ancje ai sapadins di votâ par decidi se la Patrie e à di deventâ une Republiche sovrane e indipendente. Come Sapade, al vôt vie internet (www.plebiscitofriulano.eu) previodût par Otubar, a podaran partecipâ ancje chei altris citadins dai comuns dal Friûl storic, o ben chei dal mandament di Puart. Al reste il fat che dute cheste insigurece sul avignî dal paîs sot il Peralbe al sta creant no pôcs problemis ae aministrazion comunâl che secont lis leçs dal Venit e varès di jentrâ te gnove Union dai Servizis dai Comuns dal Cumieli.
Stes discors al vâl par Sant Michêl dal Tiliment che dal 1 di Zenâr dal 2015 al varès di colâ dentri de gnove Citât metropolitane di Vignesie. In chest câs i problemis a son un tic diferents pal fat che la Serenissime dopo il scandul dal Mose, e sta vignint aministrade dal Comissari straordenari mandât dal Guvier al puest di Orsoni. Di une bande cualchidun come il stes Comissari Zappalorto al volarès lâ indenant cul progjet metropolitan, altris invezit, come la presidente de Provincie Zaccariotto, a disin che al è miôr spietâ lis elezions aministrativis de Primevere dal 2015. Che a coincidaran ancje cul rignuviment dal Municipi di Sant Michêl e cul gnûf referendum che il comitât “Pro Friuli” al è rivât a otignî. In sostance al è dut un madracâr. ❚
Il Cjargnel