Sfuei Mensîl Furlan Indipendent
Archivi de Patrie

SLOVENIE. Il gnûf parlament sloven vignût fûr des elezions di Lui

............

Cuntune percentuâl di vôts di plui dal 34% Miro Cerar, cuntun partît fondât plui o mancul doi mês prime, al à vinçût – daûr dal pronostic – lis elezions politichis dai 13 di Lui, otignint il secont miôr risultât inte storie des elezions slovenis. Dome LDS intes elezions dal 2000 al veve vût un consens un pôc plui alt. Il jurist sloven al podarà contâ su 36 parlamentârs (su 90) e za intai prins dîs dopo lis elezions, dilunc di un colocui informâl cul president de Slovenie Borut Pahor, al à declarât di volê formâ un guvier che al puedi contâ suntune maiorance stabile.
Cerar, che nol vûl jessi colocât ni a diestre ni a çampe, al à però za escludût la colaborazion cul secont partît dal paîs, i democratics (SDS, di centridiestre) di Janez Janša, che si son adiudicâts 21 seçs. Un di chescj al è stât concuistât propit dal ex prin ministri che al è daûr a scontâ in preson la sô pene detentive di doi agns, che i è stade dade intal procès par coruzion sul affaire Patria. Janša, daûr di ce che al è stât stabilît dai judiçs, al varès acetât une promesse di coruzion dilunc dal so mandât di prin ministri par favorî la aziende finlandese Patria, furnidore di 135 blindâts vendûts al stât sloven. Il leader di SDS, che al è stât fin cumò simpri elet in parlament, al è il prin politic che al podarès fâ il so rûl di parlamentâr de preson. Al reste di fat di verificâ se il so mandât al vignarà invalidât parcè che la leç slovene e previôt sì la decjadence dal mandât in câs di condane a une pene detentive superiôr ai 6 mês, ma dome se la condane e sucêt dilunc dal espletament dal mandât.
In totâl, a son siet i partîts che a àn passât il limit di bariere dal 4% e a son jentrâts duncje in Parlament. Tra chescj, e je ancje la coalizion di çampe Združena levica (Çampe unide), cumò cuarte fuarce dal paîs. Il so risultât, cuasi il 6% dai consens, e je une des sorpresis plui grandis di cheste consultazion eletorâl. Di fat, i scandais i assegnavin ben pocjis pussibilitâts di lâ di là dal 4%. Sodisfazion ancje inte file dal partît dai pensionâts DeSUS di Karl Erjavec, che al devente il tierç partît sloven cul 10% cirche des preferencis. A son jentrâts in parlament ancje i socialdemocratics che però si son vûts di contentâ dal 5,96%, cuntun consens cuasi dismiezât a pet des ultimis elezions dal 2011, intant che sîs agns indaûr a vevin vinçût lis elezions cun plui dal 30% dai vôts. Al torne in parlament ancje Nova Slovenija – Krščanski demokrati, unic partît di diestre, in plui di SDS, inte gnove legjislazion. Gnove jentrade, il partît de prime ministre dimissionarie Alenka Bratušek, formât dopo il “divorzi politic” di Zoran Janković e de sô Pozitivna Slovenija. Il sindic dibatût di Ljubljana e il so partît, insiemei cu la Liste Civiche e cul partît popolâr SLS, restâts ducj disot dal 4%, a son chei che son stâts batûts in maniere plui fuarte in chestis elezions.
Rivuart aes elezions politichis, al va zontât ancje che la legjislazion slovene, al contrari di ce che al sucêt in Italie, e risierve doi puescj in Parlament ai rapresentants des comunitâts nazionâls minoritariis taliane e ongjarese. Chescj a son votâts di chei che a fasin part des dôs comunitâts e che a son iscrits in listis eletorâls specifichis. A rapresentâ i talians in Slovenie al sarà Robert Batei, unic candidât, che al è sentât in Parlament za des primis elezions slovenis democratichis dal 1990. I ongjarês a àn confermât invezit László Göncz, ancje lui candidât unic, elet pe prime volte intal 2008. ❚
Tjaša Gruden

L'Editoriâl / Risierve di valôr

Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +

Salon Internazionâl dal Libri di Turin 2023

Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +

COROT. Nus à lassâts Sergio Salvi

Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +

Glesie Furlane / Grop amîs di pre Toni. Program dai events pal 2023

1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +