FRIÛL EUROPE. Tal gnûf PE no son dome i antieuropeiscj. E al è ancje un pôc di Friûl

La Europe e clame e la Europe e rispuint, intune maniere mancul piês di ce che si pensave. Dal vôt pal Parlament european (PE), compagnât di un dibatiment concentrât sui temis des politichis statâls e plen di vecjis sflocjis nazionalistichis, e salte fûr une situazion par sigûr complicade, marcade ancje dal astensionisim, che al è stât altonon soredut tai Stâts jentrâts te Union europeane tai ultins dîs agns. I risultâts a son il spieli de crisi politiche, economiche e istituzionâl, però de composizion dal gnûf PE e salte fûr ancje la pussibilitât di vierzi une gnove fase di rilanç.
Cun di fat, i antieuropeiscj a àn cjapât tancj vôts, ma mancul di chel che si spietavisi. Tal gnûf PE si manten une rapresentative significative dai “eurocritics”, chei che a son a pro di une Europe divierse e plui europeane: dai Verts ae Çampe europeane e ae Aliance libare europeane (ALE). Cun di plui, ancje dentri dai “partîts a nivel european” plui impuartants si àn palesadis posizions che a fasin indenant une prospetive di cambiament.
La prime verifiche di chest e sarà la elezion dal president de Comission.
Lis elezions europeanis a son ladis avonde ben pes fuarcis politichis nazionalitariis e regjonalistis che a àn rivât a presentâsi, stant che i mecanisims eletorâi e la dimension des circoscrizions no zove  ae lôr partecipazion. In particolâr al è stât un sucès dai flamands de N-VA cun cuatri eurodeputâts par om, e – doi seçs par om – pe Esquerra Republicana de Catalunya (ERC), prin partît catalan cul 23,6 %, e pal Partît nazionâl scozês (SNP), cul 28,9%. A àn un eurodeputât ancje la coalizion metude adun de çampe basche e galiziane e chê di Primavera européa, cun aragonês e valenzians, compagn dal Partît dal Gales e de Union dai rus de Letonie. Nuie ce fâ pe coalizion regjonaliste tal Stât francês.
A Strasburc al sarà ancje il Friûl, almancul chel targât PD, cu la pontebane Isabella De Monte e cu la bolognese Elly Schlein, che e je stade la uniche candidade che vie campagne eletorâl e veve dedicât un incuintri specific aes cuistions che a tocjin lis minorancis linguistichis di chenti. Se prime dal vôt al someave dificil sintî alc di sest in cont di Europe e Friûl, cumò si à di spietâsi, e salacor di pretindi, che al vegni fat alc di european e di furlan. ❚
✒ Marco Stolfo