Une scuele dongje ae comunitât e funzione miôr di chês altris

“La globalizazion e lasse fûr la scuele dai siei procès tant mancul di îr”. Alessandro Cavalli al stime tant che ‘risultâts che a varessin di fâ saltâ su la cjadree ducj chei che si interessin di scuele e di educazion’, chei otignûts dai fantats talians di cuindis agns – a ben che distints in macroareis regjonâls e par tipologjie di studis – intes investigazions internazionâls PISA, ducj risultâts in maniere significative disot de medie dai paîs OCSE.
Calcolâts di fat i risultâts dal nestri sisteme scolastic, la politiche nazionâl e cjape cussience de dibisugne di adotâ une politiche di rilanç dal fâ scuele cu la adozion di plans plui organics e integrâts par progjetâ azions di disvilup e di potenziament dai nestris percors di istruzion e di formazion, inte prospetive de costruzion di une dimension europeane de istruzion.
Di fat, a risultin deludentis lis prestazions dai nestris students in dutis lis trê lis areis indagadis (Reading, Mathematical and Scientific Literacy) e intal frame work di problem posing and solving, denotant pocjis competencis intai setôrs strategjics de cognossince, ancje in relazion ai lengaçs di base (un tierç dai students talians nol passe il prin nivel de scjale des performances matematichis). Cun di plui, si note une basse capacitât di meti in at procès cognitîfs autonoms, cu la dificoltât prevedibile a poiâsi su chescj nivei di cognossincis intune prospetive di lifelong learning.
Ma, par chel che chi nus interesse – o ben lis azions di miorament di podê introdusi, ancje se cu la cussience che la aree furlane e continue a contrassegnâsi pes buinis evidencis ripuartadis – al è impuartant rimarcâ cemût che, ancje se inte dificoltât di operâ corelazions definitivis stant che i paîs osservâts a àn identitâts gjeopolitichis e scolastichis diviersis, i risultâts positîfs di cualchi paîs intal sigurâ il sucès formatîf, o sedi la acuisizion di un cuadri complès di competencis e di meta competencis, a sedin di associâ  ae esistence di sistemis scolastics decentrâts. O ben, sistemis che a previodin relazions organichis e sinergjichis cu lis comunitâts istituzionâls e i ents teritoriâi, cuntun grât alt di autonomie funzionâl e une flessibilitât impuartante inte ufierte dai percors formatîfs. Flessibilitât che si tradûs in programs di cualitât, di definî in relazion al contest. Chest al assum duncje une rilevance strategjiche se o pensìn ae intensitât de variabile dal contest intal determinâ la trasformazion de scuele di lûc di riproduzion des diferencis socioculturâls a lûc di promozion de diversitât, intal cuadri dal insiorament e dal potenziament des identitâts cognitivis di ogni fantat, tant che al sugjerît aromai de plui part de leterature su la autovalutazion dai sistemis scolastics. ❚
Rose Turchine