LA VÔS DE CISL. Finanziarie 2014 e novitâts fiscâls

PROROGHE DE DETRAZION PAI INTERVENTS DI RECUPAR DAL PATRIMONI EDILIZI
E je stade disponude une altre proroghe de detrazion Irpef pai intervents di recupar dal patrimoni edilizi, cul limit massim di spese di 96.000 euros.
In particolâr, la detrazion e je ricognossude inte misure dal:
¬ 50% pes spesis sostignudis intal periodi 26.6.2012 – 31.12.2014 (impen che 31.12.2013);
¬ 40% pes spesis sostignudis dal 1.1 al 31.12.2015.
Dal 2016, la detrazion e sarà te misure previodude a regjim, duncje 36% cul limit di spese di € 48.000.
Cheste detrazion e je di podê doprâ par intervents di manutenzion straordenarie, pes oparis di restaur e risanament conservatîf, pai lavôrs di ristruturazion edilizie fats su lis singulis unitâts imobiliârs residenziâls di cualsisedi categorie catasticâl, ancje rurâls, e su lis lôr pertinencis.
Ancje la prevenzion dal compiment di ats ilecits de bande di tierçs si puedin detrai. Cussì tant che altris gjenars di lavôrs tant che la instalazion di une stue a pellet o dal climatizadôr.
Viodude la complessitât de normative, si rimande ae vuide de Agjenzie des Jentradis, che si pues scjariâ dal so sît.
PROROGHE DETRAZION ACUIST MOBII / ELETRODOMESTICS
E je sprolungjade fin ai 31.12.2014 la detrazion Irpef dal 50% pes spesis sostignudis pal acuist di mobiliis e grancj eletrodomestics che a jentrin inte categorie A+ (A pai fors).
La detrazion pal furniment e à di sotstâ a une serie di cundizions:
¬ Lis spesis pai furniments a son previodudis par imobilis in ristruturazion, che par chê si usufruìs za de detrazion dal 50% (viôt parsore).
¬ I lavôrs di ristruturazion a àn di jessi scomençâts prime dal acuist dai furniments. Nol è invezit necessari che a sedin ancje finîts. Al è pussibil duncje che i furniments a vegnin comprâts e paiâts prime che a sedin ultimâts i lavôrs di ristruturazion.
¬ No ducj i lavôrs ogjet de detrazion dal 50% par recupar dal patrimoni edilizi a son ametûts tant che lavôrs di ristruturazion par podê usufruî de detrazion sui furniments. Dome i câs di intervents di manutenzion straordenarie, restaur e risanament conservatîf e di ristruturazion edilizie a permetin la detrazion dai furniments. Invezit, par esempli, la instalazion di implant di alarme, di stue a pellet o di implant di climatizazion no son ametûts.
¬ Si pues cuistâ cualsisedi gjenar di furniment. Duncje, par esempli, se o ristruturi il bagn o pues puartâ in detrazion l’acuist di une gnove cusine o di un frigorifar.
¬ Il paiament dai furniments al à di jessi fat cun bonific dulà che si specifichin dutis lis vôs che dopo a tornaran utilis intal moment de declarazion dai redits (viôt parsore) o ancje cun cjarte di credit.
Pai furniments al è pussibil puartâ in detrazion fin a un massim di 10 mil euros, che il lôr rimbors dal 50% si podarà recuperâ in 10 agns.
Par plui informazions, al è pussibil consultâ la mini vuide preparade de Agjenzie des Jentradis. ❚
✒ Marianninna Rocco, Responsabile Fiscâl Caf Cisl Udin