Timp di licuidazions? Al somearès di sì, viodudis lis compris che a son stadis fatis intai ultins timps in Friûl (Amga, Latariis Furlanis, apalts pal stadi) e che a somein che no cognossin frens. Il gnûf front che si vierç al è cumò chel dal credit: CariFvg, la Casse di sparagn regjonâl, e riscje cumò di jessi inglobade in Cariveneto, simpri dal Grup Intesa San Paolo. Razionalizazion, e ven definide.
Lassìn stâ i aspiets esteriôrs (il cambi di non, par esempli) e concentrìnsi sui efiets pratics cierts (su nivei ocupazionâi e sportei al è ancjemò adore par pronunziâsi): centris decisionâi strategjics che si slontanin dal teritori; mancul jentradis pe Regjon par svariâts milions di euros; pericul di riduzion dai contribûts che la Fondazion Crup, azioniste di CariFvg, an par an e met sul teritori. No dome dal mont politic, ma ancje di chel economic, si son sintudis za vôs preocupadis: dal rest, il credit al reste l’element centrâl pal disvilup des aziendis e al è il pericul che il slontanament dai centris decisionâi, cu la pierdite di un contat vêr cul teritori e la cognossince aprofondide dal tiessût produtîf locâl, al puedi tradusisi intun dam grâf pes aziendis furlanis.
Ma, dal rest, chê di Cariveneto no je la uniche operazion che e cjape dentri il sisteme creditizi regjonâl. Dopo plui di cuarante agns, di fat, Lorenzo Pelizzo al salude la presidence de Bancje Popolâr di Cividât. Intal procès di rinovament, in ogni câs, la “liende” familiâr e continue cu la presince dal nevôt di Lorenzo, Guglielmo, avocat, fi di Giovanni (ex president de Provincie e de Ausse Cuar). Sul avignî de Cividât, che e à sierât il belanç 2013 in ros, lis vôs si stracin e si fevele di pussibii interessaments de bande di altris bancjis popolârs (tra chestis la sudtirolese Volksbank, che e à metût inte smire Marostica), ancje se Lorenzo Pelizzo al à subordenât il propri pas indaûr al mantigniment de autonomie dal istitût cividin, dulà che però ancje tra i socis al è un ciert discontent, viodûts i risultâts resints. O starìn a viodi.
La situazion dal setôr dal credit si fâs duncje delicade, a plui reson se si calcolin lis tensions intal mont des Bancjis di credit cooperatîf, dovudis ai contrascj sul contrat integratîf regjonâl. E soredut se si ten cont dal disastri rapresentât dal câs Mediocredito Fvg, che par chel e je previodude une ricapitalizazion fuarte (intal ordin dai 100 milions) e che, al pâr, al acusarà ancjemò pierditis intal ordin dai 60 e 40 milions, in maniere rispetive, intal 2014 e 2015. Almancul, stant a ce che e à afermât di resint la neo-presidente Cristiana Compagno. Di visâsi, a chest fin, che al plan di ricapitalizazion no varès di partecipâ la Popolâr di Cividât (che e deten pôc plui dal 2,5% dal capitâl sociâl), intant che la Fondazion CrTrieste (Grup Unicredit), seconde azioniste dopo la Regjon cun plui dal 32%, e scuen ancjemò jessî des risiervis. In câs di dinei, pai socis si tratarès di vê di assumisi une altre cjame…
E chest nol è ancjemò dut. Parcè che Bancje Popolâr di Cividât e CariFvg a àn za anunziât di volê esercitâ la “way out”, trasformant la partecipazion detignude inte finanziarie regjonâl Friûl in azions di Autoviis Venitis. Operazion logjiche: Autoviis e devente cussì un “ripâr” sigûr, a front de situazion incierte di Friulia (che dentri al figure Mediocredito, che fin al 2016 nol rivarà al pont di paritât di belanç). Insume, miôr un rindiment sigûr, evitant cussì chei pericui che invezit a varessin di jessi leâts in maniere natural al “fâ bancje” e colaborâ al disvilup e ae cressite dal tiessût produtîf dal teritori. Ma, si sa, no son timps facii e il cont economic al dete leç. Dal rest, parcè mai lis bancjis varessino di racuei l’invît de presidente Serracchiani a “un sens responsabil di comunitât”, cuant che Mediocredito e Friulia a àn dât esempli, intal timp, di no preocupâsi masse, almancul a judicâ dai risultâts? Ae fin de fiere, al solit, a paiâ a son il tiessût produtîf e il teritori. Intal spirt plui pûr de leç dal Menga. ❚
Linux
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +
Int di Cjargne / “La gallinella saggia” che a Cjavaç e insegne a produsi e a mangjâ ben
Marta Vezzi
La aziende agricule biologjiche La Gallinella Saggia e je nassude 7-8 agns indaûr: “La idee e je stade di mê mari – e conte Caterina Pillinini – che e à simpri fat orts e cjamps, e duncje e je une vite che si dediche ae coltivazions di tancj prodots; vint il ristorant Borgo Poscolle e […] lei di plui +