- Gradiscje di Spilimberc, ai 26 di Zenâr 2014. Di çampe a man drete, in pîts: Adrian Cescje, Zuan Franc Passon, Mateu Bortuç, Renât Jervâs, Rem Spicemei, Franc Todesc, Duili Cescut, Albert Fabris, Renç Maiorche, Claudi Taboghe, Zorç Jus, Aldo Caligâr; in scrufuiut: Zuan Denêl Zorat, Claudi Sion, Robert Visentin, August De Cec, Fredinant Di Cente.
A son za trê agns che si cjatin. Un sorte di comitât di chei che a son stâts dal Moviment Friûl e che lôr a clamin Fondazion pal archivi storic dal Moviment Friûl. Si son cjatâts la prime volte a Pontebe, ae fin di Zenâr dal 2012, plui o mancul in ocasion dal inovâl de muart di Fausto Schiavi. Une scjampade tal cimitieri de citadine par un salût e une preiere al president dal partît, muart tal 1972, e po intor di une taule par discuti in compagnie in ce mût e in ce maniere che si podeve imbastî la racuelte dai documents di archivi dal MF, dal sfuei che al fo il so orghin di stampe, Friuli d’Oggi, la lôr catalogazion e la lôr difusion par mieç di Internet. Il proposit al è po chel di consegnâ dute la documentazion in cjarte, ben catalogade, ae Biblioteche Civiche di Udin. Po a àn fat compagn un an dopo, simpri a Zenâr. Si son cjatâts a Montenârs, par ricuardâ pre Checo Placerean li che al polse par simpri, e po intor di une taule, pal plasê di gustâ in compagnie e pe bisugne di verificâ insiemi i prins risultâts de vore di archiviazion documentarie eletroniche sul sît che si lu cjate ae direzion www.archivi.movimentofriuli.it e che al al à non ARCHIVI STORIC DAL MOVIMENT FRIÛL – Partît autonomist nazionalitari dal Friûl. La vore di archiviazion e je continuade par dut il 2013, e e à prospetive di continuâ ancjemò par cualchi an, pal timp che al covente: lis pagjinis di Friuli d’Oggi, di Patrie dal Friûl jessude tra il 1977 e il 1988, documents internis e di propagande esterne su cjarte e vocâi, cu la vôs di pre Checo Placerean, di Fausto Schiavi e di altris dal partît, manifescj, volantins, statûts dal Moviment … si puedin za consultâ, viodi o scoltâ. Une vuide e jude a navigâ dentri dal Archivi. Ancje chest an i amîs dal MF si son cjatâts domenie ai 26 di Zenâr, cheste volte a Gradiscje di Spilimberc, ospits di Robert Visentin, par gustâ insiemi, par ricuardâ Elvio Menin e Bruno Sedran, che a forin i amîs di Spilimberc dal Moviment che no son plui, e aprofondî cu la discussion cierte documentazion e cierts moments de storie passade dal Moviment, che e rivuarde la dade di timp de presidence di Fausto Schiavi. Chei che a àn conduradis tantis lotis politichis e passions insiemi dilunc di un cuart di secul, tant e je durade la presince ative dal Moviment, si cjatin pal plasê di cjatâsi e di memoreâ, ma ducj a menin cun se il displasê di assisti ae distruzion progressive di chel patrimoni di concuistis e di dignitât politiche pe identitât furlane che al pâr che no si fermi se nol resurìs un gnûf slanç autonomistic, cu la stesse muse e la stesse determinazion gjenerose di chês che a son stadis dal Moviment Friûl. L’Archivi storic lu dan dongje pe memorie, ma ancje tant che segnâl di sperance. ❚
Rem Spicemei
