Sfuei Mensîl Furlan Indipendent
Archivi de Patrie

1914-2014 IL CENTENARI DES BAUSIIS E DE VERGOGNE. Cui aial copât Franz Ferdinand?

Agnul Floramo

Scomençade cul prin numar dal 2014, ve ca la nestre “cuintristorie” de prime vuere mondiâl memoreade chest an. Une grande tragjedie che e à puartade la muart di tante puare int, e che in Friûl e à metût furlans cuintri furlans in non di decisions cjapadis parsore dal lôr cjâf. Nô o contarìn storiis e aspiets de cuistion che la retoriche dai Stâts nazionâi no à mai contât. (2e pontade) ✒ Redazion

Predrag Finci al è un “ladin” di Sarajevo: cussì là vie a clamin i dissendents di chei ebreus sefardits parâts fûr de Spagne catolichissime tal 1492, che a cjatarin la lôr salvece sot la protezion dai Turcs di Bosnie. Cuant che Islamics e Judeus si consideravin ancjemò fradis parcè che fîs di Abram. La lenghe dai siei vons e je cussì dolce e facile di capî par nô furlans che al fâs cuasi impression a sintîlu contâ li sôs storiis, savint dulà che al è nassût. Ancje se “Ladin”, tal so câs, nol è il stes che tal nestri. Scjampât a Londre intant de ultime vuere dai Balcans, ven a stâi vincj agns fa, Predrag al è considerât un dai filosofs e scritôrs europeans contemporanis plui interessants. Al à a pene publicât, tal Zenâr di chest an, un libri di grandissim interès. Si intitule “Cui aial copât Franz Ferdinand?”. Une apassionade ricercje – purtrop par cumò disponibile dome in Inglês – su lis resons plui veris e di simpri tignudis scuindudis – pai motîfs che si podaran ben capî – di chel sassinament cjapât come pretest dal Imperi de Austrie e Ongjarie par tacâ la prime grande vuere mondiâl. Finci al esamine cjartis, procès, documents di archivi, e ju confronte cul pinsîr politic, cu lis ideis filosofichis, lis teoriis sociâls di chê epoche. E al ven fûr un cuadrut pardabon gnûf, plen di significâts e di intersezions che fin cumò a son stadis platadis, o mai metudis sot la lint de storiografie uficiâl. Parcè che – al dîs Predrag – la cuistion e je cheste: la grande vuere e je stade il tentatîf des nazions maioritariis, o almancul di une cierte classe politiche che jenfri la fin dal Votcent e il principi dal Nûfcent lis vuidave, di scjafoiâ e di gloti intun colp chel mosaic di popui, lûcs, culturis e identitâts che inte ete romantiche si jerin dismovûts, scuvierzint la lôr specialitât fate di religjons, nainis, contis, liendis, alfabets. La Gjermanie, completade la unitât dal popul todesc, e veve licenziât Otto von Bismark che al preferive il dialic e il compromès ai canons; e sot de ideologjie de “haimat” e stave eliminant dutis lis sôs minorancis, imponint une regule di stât: ce che plui tart al deventarà cun Hitler il trement “ein volk, ein land, ein fürher”; la France, incjocade di nazionalisim e invelegnade cuintri i todescs che le vevin striçade tal 1870 a Sedan; la Ingletiere, che de bande sô e voleve difindi in Europe un ecuilibri teritoriâl par podê mantignîsi tes coloniis il vantaç di un Imperi; la Russie zariste, sterminade, che e pretindeve di jessi la mari di ducj i slâfs, clarementri cu la ambizion di controlâ lis jessudis e i puarts dal Adriatic. Fintremai l’Imperi dai Turcs al sperave di parâ fûr la ultime berlade prime di sclopâ dal dut. E la Italiute, tal mieç di ducj chei zigants, daspò vê pontât i pîts par concuistâsi ancje jê un tocut di Imperi, tacant cu la Afriche orientâl e finint in Libie (al fo simpri un disastri!), cumò e voleve imponisi sul senari internazionâl par gafâ ancjemò cualchi toc di teritori sogjet ae vecje aversarie di dut il Risorziment talian, ven a stâi la Austrie e  Ongjarie. Pecjât che tal 1882 e veve firmât cun jê e cu la Gjermanie un tratât di aleance, la famose Triple Aleance! E duncje vie a sburtâ su la cuistion nazionâl, sui lis tieris di deliberâ dal forest, su la italianitât di popui che – escludude une minorance borghese italofile, pal plui inurbade tes grandis citâts – no ur freave propite nuie di deventâ talians. Anzit, a stavin cetant ben là che a jerin, integrâts intun sisteme, chel asburgjic, che al garantive a ogni minorance la sô lenghe, la sô culture e la sô rapresentance. Sierade la cuistion meridionâl tal 1861, sierade chê romane tal 1870, e restave duncje ai regnicui di risolvi dome chê setentrionâl. Ma nissun storic al à mai vût, fin cumò, il coraç di clamâle cussì, cul so non. Finci invezit al considere la reson de vuere propit partint de idee di une cuistion nazionâl. Ma ribaltant la prospetive tradizionâl, che e viodeve il conflit come la ultime grande bataie dai popui europeans. Tai prins agns dal Nûfcent, une straordenarie curint di pinsîr, peade ae primevere des nazions dal 1848, e insisteve su la necessitât di valorizâ lis nazions cuintri i stâts, dineant la logjiche dal Congrès di Viene dal 1814-1815, che invezit al veve progjetade une Europe dai stâts e des lôr resons. Cheste gnove idee politiche e scombateve ancje cuintri ogni forme di ideâl risorzimentâl che al copàs i popui plui piçui par fâju scomparî jenfri chei plui grancj. Une intuizion che e veve cjatât in Franz Ferdinand un grant preseadôr e cussì ancje tal so sucessôr, ven a stâi Carli I di Asburc, chel che al invidarà tal Parlament di Viene, cualchi an plui tart, ancje un grup di delegâts furlans che a poderin esprimisi in lenghe furlane, come che o viodarìn inte rubriche dal mês che al ven. Il ricognossiment di popui peâts ae lôr lenghe ma ancjemò cence un stât, come i polacs, dividûts jenfri la Russie, la Austrie e la Gjermanie; o come i slâfs dal sud, dividûts sot lis sgrifis di Austrie, Ongjarie e Turchie; e ancje i furlans, che za a domandavin la plene facoltât de autodeterminazion. Duncje, cui aial copât Franz Ferdinand? La rispueste e je ben clare: i nazionaliscj stataliscj e centraliscj, chei che no volevin dâi autonomie ai popui, chei che a varessin costruide, subite daspò de vuere, une societât là che fassisim e nazisim a varessin preparade la gnove vie par une Europe dai stâts ditatoriâi. Là che nol sarès stât puest par pensâ, lei, scrivi, esprimisi in maniere difarente di chê volude dal centralisim di un stât autoritari e fuart. Par chest, Franz Ferdinand al ven puartât fûr vie, tal so percors a Sarajevo: la sô machine e cjape une strade che no doveve fâ. E propite li, sul puint ladin di Sarajevo, cun lui al mûr il progjet di une Europe dai popui. Gavrilo Princip al fo dome la man di un complot une vore plui grant di lui. ❚
Angelo Floramo

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +