LA VÔS DE CISL. Il gnûf ISE – ISEE

Il Consei dai Ministris, ai 3 di Dicembar dal 2013, al à fat bon il “Regolament su la revision des modalitâts di determinazion e i cjamps di aplicazion dal Indicadôr de situazion economiche ecuivalente (ISEE)”.
Intant, sclarìn che i tiermins ISE e ISEE a rapresentin doi valôrs rilevabii di chel stes document che e je la DSU (declarazion sostitutive uniche). A son doi parametris che di volte in volte a àn di jentrâ dentri cierts limits imponûts tai bants emetûts di ents locâi o dal stât. Duncje, par esempli, il valôr massim ISEE pe domande dal bonus energjie e gas al è di 7.500 euros, dulà che invezit par vê la Cjarte famee la regjon e domande un valôr massim ISEE di 30.000 euros.
Pal calcul dal ISEE si ten cont de situazion dal redit e dal patrimoni (cjapant dentri il patrimoni mobiliâr e imobiliâr), cun abatiments peâts a cjasis di prime abitazion e sparagns, parametrant il dât otignût cu la numerositât dal nucli familiâr e cu la presince di minôrs o disabii. 
L’ISEE al pues jessi scomponût tai siei trê elements fondamentâi:
a) l’indicadôr de situazion redituâl (ISR);
b) l’indicadôr de situazion redituâl patrimoniâl (ISP);
c) la scjale di ecuivalence pe ponderazion de composizion dal nucli.
La novitât introdusude dal gnûf decret e je la inclusion tal ISR des sumis percepidis ancje se esentis de imposizion fiscâl, come par esempli lis pensions di invaliditât, l’assegn di maternitât, la pension sociâl, l’assegn pal mantigniment dai fîs, lis renditis catasticâls dai bens imobiliârs (terens e fabricâts a vuê sometûts dome ae IMU e no plui ae Irpef), redits forescj no tassâts in Italie, redits sometûts a impueste sostitutive o a ritignude a titul di impueste, come par esempli i compens dai vendidôrs puarte a puarte, e v.i.
Tal calcul de sume dai redits, al è ametût ancje cualchi sfrancjament, par esempli par cui che al vîf in afit, cun increments in plui leâts ae presince di almancul doi fîs convivents; cui che al à redits di lavôr o pension, o pûr cui che al à tal propri nucli sogjets cun disabilitât che, tal câs che a sedin minôrs, si aplichin impuarts plui elevâts.❚
✒ Mariannina Rocco
Responsabile Fiscâl Caf Cisl Udin