La CGIL di Belci e vûl scancelâ la muse dai furlan

Une volte al jere Camber a dâ cuintri di ogni robe che e savès di furlan. Dopo che al è indagât par lis spesis fatis cui nestri bêçs, bonbons, gjitis in Val Badie, e vacancis al mâr, par un totâl di cuasit 20mil euros, il testemoni al è passât al segretari regjonâl de Cgil, Franco Belci. Ducj i doi triestins patocs.
Belci, tant par capîsi, al è un di chei par l’inglês al puest dal furlan, in prime file pal eletrodot, pe abolizion des provinciis: in sumis “Triest caput mundi”. Se cheste e fos la sô posizion personâl, amen. La cuistion grivie e je che al cjacare simpri di segretari de Cgil. A contin che cuant, cun tante timidece, intune riunion de Cjamere dal lavôr di Udin, cualchi sindacalist al diseve la sô propit su Terna, industriâi e ambient, il Belci no lu faseve nancje fevelâ. Dome lui e naturalmentri Triest.
La ultime chê altre dì ae cunvigne de Cgil su lis autonomiis locâl. Cussì Belci, par talian: «…evitant scurtis e derivis di fate localistiche o identitarie».
Duncje jessi e sentîsi furlans, ma a chel pont ancje slovens o no, al è une “derive identitarie”.
Ma i sindacaliscj furlans de Cgil no àno propit nuie di replicâ a cheste supierbie, a chest personaç? O forsit sono dacuardi cun lui? Se al è cussì che no vegnin plui a fevelâ di dirits e democrazie. ❚
✒ L’om di Buri