MUSICHE. Cjantâ vilotis jenfri tradizion e “tradiment”

Al à tacât a cjapâ man cui cjants furlans di frut cui vecjos di Trivignan, “a sun di tais di blanc”. E ju à puartâts cun se in dut il sô percors musicâl fin al ultin apontament cu la Gnot di Sant Zuan, ai 23 di Jugn a Tavagnà, dedicade apont aes vilotis. Loris Vescovo, cjantautôr di riferiment tal panorame de musiche in marilenghe, che cumò al è daûr a butâ fûr il so ultin disc “Penisolâti” (www.lorisvescovo.com) – “un trop di storiis che a tabain di isolament, di distance e di distac” -, nus spieghe parcè che no je tradizion cence tradiment.
✽ Dut al è scomençât in glesie…
Di frut o sunavi l’orghin te “Schola Chantorum”. Cul stes coro che al cjantave Kyrie e Gloria (massime di Giovan Battista Candotti) in glesie, dopo si leve te ostarie e si cjantavin vilotis. E cussì o ai vût mut di preseâ la ghenghe e il sunôr spontani des vilotis: la vôs fuarte, di nâs, plene di armonics, une vore rustiche. A cjalâ ben lis robis, e jere une continuitât tra Candotti e lis vilotis: ancje lis messis par latin che o cjantavin a vevin alc di “furlan”, te melodie e tai sunôrs. Di fat, i vecjos dal coro lis cjantavin plui o mancul cu la stesse ande des vilotis. Te messe “brevissima” di Candotti a voltis si sint il savôr des vilotis. Sacri e profan messedâts…
✽ E po dopo, cemût lis âstu fatis tôs?
Dopo vê imparadis tantis des mê bandis – vecjis, ma ancje inventadis di gnovis e strambis – o ai tacât a scoltâ i concierts dal coro di Gilberto Pressacco, i prins discs de Sedon Salvadie, di Lino Straulino, dai Mitili, dai Furclap, e vie indenant. E cussì o ai tacât ancje jo a cjantânt cualchidune, a gno mût. A chei timps o vevi metût cualchi altri tamês popolâr dentri dai miei prins discs e po dopo, insiemi cun Caia Grimaz, o ai metût un biel pocjis di vilotis tai miei spetacui “Pierpauli” (dedicât a Pasolini) e “Dagos” (spetacul su la emigrazion furlane).
✽ Fin al progjet “Cjantâ Vilotis”…
Tal progjet, coordenât di Fabio Chiocchetti de comunitât ladine de Val di Fasse, a jerin dentri Destrani Taraf, Marmar Cuisine e Antonella Ruggiero. Jo o ai partecipât cun Caia Grimaz e cheste e je stade une biele ocasion par imparânt di altris insiemi cun jê. Une des ultimis che o ai imparât me à cjantade cualchi an indaûr puar Giorgio Ferigo. Mi à cjantade une version di “Mieli” cuntune melodie une vore particolâr.
✽ La tô vilote preferide?
“Ce mai sarà” (cognossude come “Chê dal falset”): al è un cjant di Gjiviano che là sù si cjantave compagnant i muarts tal cimitieri. E dîs: “Ce mai sarà? Al sarà che dut al è nuie, e che in chest mont no vin di stâ. In chest mont vin pocjis oris e, in chel atim, l’eternitât”. Ve, forsit cheste e jê le la cjantade plui biele par me. Cence timp. O pensi ancje che al sedi impuartant pandi e tramandâ soredut lis vilotis plui “discomudis”: chês di proteste, vilotis erotichis, cuintri de vuere, insome cjants che no tu ti spietaressis e che a son stâts un pôc platâts. Come che al diseve propite Giorgio Ferigo, i sorestants dispès a àn “filtrât” i contignûts des vilotis par strucâ la culture furlane intal mît dal “salt, onest, lavoradôr”. E cussì, si sin abituâts a une vision “oleografiche” de vilote, sul stamp dal “Mulino Bianco”, par capîsi.
✽ Esemplis di vilotis “discomudis”?
“Tu tramontis” (cjapade sù di Giulio Venier e dai Mitili) e je sigurementri une di chês che no tu ti spietis (“e jo no, no pensi nuie, di vô bulo borghesan, ai in cûl la vuestre jentrade, us refudi il vuestri pan”). “Tumburus” (che e jere cjantade dal Cjançonîr di Dael) e fevele di un pescjadôr di Acuilee che “al met al dêt ta speca e al trata d’imbroiâ”. Nuie a ce fâ cul salt, onest e lavoradôr, insome. Il popul furlan ae fin al è un popul come cualsisedi altri: al pues jessi dolç, rabiât, a voltis magari stramp, che al pues cjantâ alc di alt e di filosofic, o ben ancje une cjante “sporcacjone”.
✽ Ce pensistu dal dibatit sul rûl de tradizion inte musiche furlane?
Cualchidun al dîs che la “gnove musiche furlane” no esist, che e je musiche par furlan e no musiche furlane. Cualchidun altri al dîs che la musiche sunade dai furlans e je musiche furlane, e po bon. La idee di Lino Straulino de vilote tant che improvisazion sul stamp “rap”, de vilote gnove “di autôr” e je une strade interessante (viôt Patrie di Març, ndr), une sorte di puint tra musiche tradizionâl e musiche di autôr. Jo personalmentri o pensi simpri ae etimologjie de peraule “tradizion”: il verp latin “tradere” al puarte cun se il significât di conservâ (puartâ indevant) e di cambiâ (tradiment) tal stes timp. In cheste peraule a convivin tradizion e cambiament. Il tradiment e la tradizion a son come om e femine intune famee, e i lôr fruts (che si clamin novitât e doman) a son chei che a fasin lâ indenant une culture. La tradizion di bessole, incantesemade, imbalsamade e ferme, no à futûr. Ancje il tradiment, cence le tradizion, dispès al è mancul fuart. L’impuartant par me al è il movisi simpri, il panta rei. Dut al cambie, dut ce che al è vîf si môf. Il cambiament al pues metinus magari in crisi ma dome cussì si vierzin altris stagjons e oportunitâts gnovis. E par cjaminâ bisugne cjalâ par devant, no par daûr… ❚
Natascia Gargano