Sfuei Mensîl Furlan Indipendent
Archivi de Patrie

IL FERÂL. Une lûs e une vôs che a durin di mieç secul

............

I mieçs di comunicazion di vuê no son chei di îr. O miôr, no son dome chei. Ancje la Patrie dal Friûl e à scomençât tal 1946 cui piçui mieçs di chê volte, ma che a jerin grandons soredut pai ideâi che e palesave. Vuê i mieçs e struments si son rivoluzionâts cu lis tecnologjiis modernis. Ancje il nestri mensîl si è modernizâts doprant internet e ducj i striaments dal dì di vuê. Se Marchi e Marchet si incuintravin zirant in biciclete, vuê il diretôr –Dree Venier – al è a Milan, i colaboradôrs a dan une man stant a cjase, doprant il computer. Ce che nol è gambiât di chê volte al è il spirt, i ideâi, la passion par un Friûl vîf, moderni, gjenuin, che al cjamini cu la proprie muse par costruîsi la proprie storie e il propri avignî cun dignitât e libertât, cence sotanisims.
pre Roman Michelotti
Mieç secul come mil agns; e pûr a fasin part integrant de storie dal Friûl, di chel Friûl no uficiâl, no omologât, no metût in rie, no rassegnât; di chel Friûl che, te sô sotanance croniche, nol à mai mancjât di cualchi vôs profetiche, coragjose, utopistiche, che lu invidave a crevâ la cjadene de sotomission e de rassegnazion e riscjâ, almancul une volte, di scrivi la sô storie «dibessôl». Salacor si è tratât di une vôs che e berlave tal desert, come chê di Isaie, ma siguramentri no mancul grande e biele e significative.
O stoi fevelant di chel «sfuej setemanâl indipendent» che, ai 24 di Fevrâr dal 1946, al è jessût dal numar 10 di borc di Prampar e si clamave «Patrie dal Friûl». A di chei che lu compravin, ur costave 10 francs; a di chei, pôcs, che lu fasevin, ur costave sanc.
Firmis no si ‘nt cjate tal prin numar. No coventavin, dal moment che il sfuei al à une sô unitât interne che si riclame a une persone sole, come simpri in chescj sfueis artesanâls. In realtât lis personis a jerin dôs, Felix Marchi e pre Bepo Marchet, ma a scrivevin come se a fossin stadis une sole, tal sens che a jerin bulos ducj i doi e complementârs: Marchi al intuive cul so voli di acuile e Marchet al meteve jù cul so penâl di artist de peraule.
Nol è il câs di fâ la storie di cheste bandiere gloriose. Storie stentade no par mancjance di virtût dai proponents ma di corispuindince dai letôrs e di chel popul furlan cussì dûr a metisi in viaç su la strade de libertât. Machiavelli al dîs che il princip al à di vê la virtût e la furtune. La virtût o podìn metile nô; la furtune no dipent di nô. Ma chest no nus dispegne di semenâ. Parcè che dovê di ogni om e di ogni gjenerazion al è chel di semenâ. E pensarà la tiere, o la storie, a fâ florî cheste semence cuant che il clip dal soreli al varà rivât a dismovi il teren e a sveâ la plantute indurmidide. Fin che nol rive chel moment no si à floridure, ma la semence e ten dûr instes sot tiere, e soredut la tiere e je fedele e e à plui memorie di nô. Salacor ancje plui sintiment e cussience.
Marchi, cu la sô femine Marie dal Fari e cun cualchi amì fedêl, a àn tignût dûr fintremai al 1966, cuant che i numars a jessivin plui srarîts. Po une polse di agns. Dal 1977, cu la benedizion di Felix e Marie, o ai vude la furtune di cjapâle in man jo, cui miei limits di mieçs e di formazion, intun mont che nol jere plui chel. O ai puartade indenat la mê fadie fintremai dal 1988. Po mi soi scanât ancje jo e la Patrie e je passade in altris mans, di Federico dai Ros prime e di Zuanfrancesc Gubian cumò. Cui colaboradôrs plui o mancul sensibii e gjenerôs, ma che no àn mai mancjât. Dut chest par che no si distudàs un lusorut e no tasès une vôs. Un lusôr e une lûs, chei de autonomie e de lote pe autodeterminazion, che no puedin mancjâ. Pene la fin di un sium e la muart dal popul stes. O intint chel sium che nus da la pussibilitât di tirâ indenant e chê muart spirtuâl siguramentri plui umiliant di chê fisiche. Parcè che un popul cence anime e cence siums al pues dome spietâsi umiliazions e disgraciis.
Un gjornâl al à di vê une sô idee di fonde. Se no al è miôr comprâ un madrac. Al à di vê ancje la inteligjence di calâ cheste idee astrate, prejudiziâl, inte realtât concrete in moviment, in mût di podê sigurâ dôs condizion di fonde: la fedeltât a la idee e la fedeltât al moment storic.
La idee di fonde, sacrosante, insostituibil, de Patrie e je la autonomie. Ma de fin de vuere a cumò, il nestri Friûl, insieme cu la Italie e cul mont, al à fate tante di chê strade e subît tancj di chei gambiaments, che la peraule stesse e à cjapât altris colorazions. La autonomie de fin de vuere, se no fali, e jere une autonomie tal telâr locâl, al massim talian. Un progjet che no leve plui in là des monts. Vuê no si pues fevelâ di autonomie cence cjalâ almancul al contest european, là che par altri il Friûl al torne a cjapâ la sô colocazion naturâl e juste, tal rispiet de storie e de gjeografie.
In plui mi semee che i progjets iniziâi a fossin statics e soredut a nivel di rivendicazion tai confronts di un stât che al à simpri molzût cence dânus nancje un braç di stranc o di fen. Vuê si scuen lâ plui in là de rifusion dai damps e pratindi la pussibilitât concrete di inmaneâ progjets e plans di svilup economic, industriâl, comerciâl plui consonants a la nestre filosofie. Dite diferent, nol baste dome parâsi des rapinis talianis; si à di vê il dirit di fâ une nestre strade, ancje se tal interni des grandis coordenadis statâls.
Di chel che mi ricuardi dai miei contats cun cualchi protagonist de vite dal gjornâl, o ai vude la impression che si batès fuart su la culture, fonde di ogni libertât, ma pôc o cun mancul fuarce su la economie, che e sta cjapant simpri plui impuartance. No si pues vivi dome di pan, ma sigurementri nancje cence pan. Lis rivendicazion federalistichis di chescj ultins timps, justis, a àn un pecjât di fonde: si limitin a la economie, trascurant l’aspiet culturâl. Bisugne rivâ a la armonie tra economie e culture, tra interès matereâl e spirtuâl. I «paris»de nestre autonomie a van completâts cu la economie; i «paris» de gnove autonomie a àn di vê il sintiment di doprâ la cjarie culturâl, ideâl, spirtuâl dai precursôrs de autonomie furlane.
Sigurementri, cuant che a dute gnot, in biciclete, i redatôrs de Patrie a levin a puartâ lis 13.000 copiis par che a rivassin puntuâls in dutis lis borgadis dal Friûl, no varessin mai pensât a la rivoluzion tecnologjiche, informative, mass-mediatiche che e sarès plombade ancje su chest cjanton di mont dismenteât dai oms e cualchi volte ancje di Diu. In chest si pues paragonâju ai pionîrs americans che a vierzevin stradis e feradis tes pradariis inmensis dal gnûf mont. Lis lôr stradis a son stadis superadis de tecnologjie, che e à ribaltât dut di fonde fûr. Ce che no à ribaltât, par furtune, e je stade la lôr fede, la lôr idealitât, la lôr sgrime e voie di gambiament: Si pues fâ la Patrie ancje cul computer o fâle zirâ cul internet. Chestis a son cuistions che a somein grandis ma a son secondariis, come ogni mieç. Il principâl al è che no mueri la gole di autonomie, la lote pe autocussientizazion, la bataie par fâ valê i dirits dopo di vê sodisfat i dovês, la fantasie di dâ simpri gnûfs contignûts a la grande idee di fonde: la libertât, la dignitât, la anime di un popul. E se vuê o sin culì ancjemò a cuistionâ di chestis robis al è in gracie di chê grande idee floride tal cjâf e tal cûr di personis inteligjentis e inemoradis dal lôr popul. La piês robe e sarès chê di tradî chest sium, di distudâ par simpri cheste lûs e fâ tasê dal dut cheste vôs.
pre Antoni Beline

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +