CULTURE – G. Vit, Sanmartin, poesie… / O. Serena, Itinerario poetico…

Giacomo Vit, Sanmartin, poesie in friulano con traduzione a fronte, Faloppio, 2008
La ultime fadie poetiche di Jacum Vit e je publicade de cjase editore LietoColle inte golaine Aretusa, libriccini da collezione.
A son cuindis componiments leâts un cul altri tant di dâ vite a un sorte di poemut unic, dut centrât sul teme dal titul, il Sanmartin, apont, che inte culture furlane al memoree ancjemò la fin di une stagjon, cu la pôre che cheste fin naturâl e tiràs cun se ancje la disdete, vâl a dî une fin imponude dal om, dal paron, cuntune decision che e voleve dî gambiâ vite e gambiâle in piês; simpri che no si ves di lâ a finîle suntune strade.
Il Sanmartin di Vit al devente ancje alc altri, une riflession sui sanmartins de vite, che no rivin dome ai 11 di Novembar, ma plui dispès. E, dut câs, un om rivât a une cierte etât (frutùt di sincuanta ains), al scomence, magari, ancje a pensâ a chel sanmartin definitîf che ducj nus spiete. E a fâ un pôcs di conts:
Mi domandi cuant ch’a
Costarà
menà via il clar di luna
ch’i ài tignùt scundùt
tal cassetìn (…)
cual montacaric
al varà la fuarsa
di spostà cuintài
di delusions
ingrumàs tai àngui
da la ciambra
E à cjapât il secont premi intal concors nazionâl Pascoli (sezion dialets), cheste racuelte. Testemoneance dal valôr che e à la vôs di Vit ancje intun contest fûr dal Friûl. E se chest ricognossiment si lu zonte a chei di Pierluigi Cappello, alore si pues propit pensâ che une lenghe che e prodûs risultâts di chest nivel, no dome e je ben vive, ma… no pues murî.
Odorico Serena (par cure di) Itinerario poetico di Galliano Zof, Manzan, 2008
Biele iniziative de biblioteche comunâl di Manzan (che e puarte il non di Caterina Percoto) chest librut di 74 pagjinis cuntune grafiche pardabon curade.
Librut componût di dôs parts: la prime di Odorico Serena, che e rapresente une documentade e profonde riflession su la poesie in gjenerâl e su la poesie di Galliano Zof in particolâr. La seconde part e je une antologjie de produzion poetiche dal poete di Sante Marie. Cuarante componiments che a compagnin dute une vite e un itinerari uman e leterari scomençât cu lis primis lirichis dal 1966 par rivâ ai nestris dîs (lis ultimis a son dal 2003).
Naturalmentri, ogni sielte e je discutibile e cui che al cognòs il poete Zof al podarà vê une idee diferente di cualis che a son lis sôs miôr robis. Ma, dal sigûr, cheste sielte e da une idee di cuâi che a son i temis che Galliano al à simpri frecuentâts intes sôs poesiis:
La condizion dai puars,
no tu ’nd âs sanc pes venis:
tal àn supât dut cuant i siôrs
un pôc par dì
come viparis,
la solidarietât jenfri i vivents, ducj i vivents, comprendûts la vacje Viole e il mûl,
Intes seris di lune cjoche
al trotave
filìs
dilunc lis scjavaçadis
sfidant i fruts
che lu mascaravin
cun plumis di dindiat
par fâlu sintî re…
il sens de nature inte sô sensualitât,
E nas dal mâr la gnot
sui miluçârs
tai cerclis gherps de lune sore i cops,
tai vôi brusâts
des feminis…
E dome cuntune leture atente si rive a capî la profonditât filosofiche che e sta daûr tantis di chestis poesiis che pûr a parin cussì semplicis: e je la semplicitât che e ven de savietât e de fondece dal pensâ.
Laurin Zuan Nardin