Sfuei Mensîl Furlan Indipendent
Archivi de Patrie

ART-Â. Art che e nas in rêt e e viaze par pueste

............

Un mût di sfogâsi, di criticâ, in pratiche une forme di impegn civîl. Cheste e je par Silvia Giusti, zovine artiste furlane leade ae sô tiere, la Mail art, ven a stâi la art postâl, un moviment artistic che e dopre la pueste par produsi e veicolâ la art e che si interface dispès cul web. Cheste esperience si è svilupade tai agns Sessante, ancje se e à lidrîs che a nassin plui indaûr tal timp. Dal grup Fluxus al rivave Ray Johnson, che tal 1962 al fasè il prin esperiment di Mail art, mandant par pueste i siei lavôrs in dut il mont. Po dopo, al fondà la «New York corrispondance school of art», dulà che no vignivin spedît dome i elaborâts, ma ancje bustis, boi e timbris.
La art par mieç de pueste e supere lis frontieris, e ridûs pacifichementri lis distancis ideologjichis e culturâls, inserintsi tant che element dinamic di recupar e promozion dal locâl. Un moviment «globâl», che un dai plui grancj esponents al fo il furlan Piermario Ciani, e conte Silvia, che e je jentrade in chest mont «di grande creativitât» pôcs agns indaûr, rispuindint a une «clamade».  Ven a stâi a un progjet di racuelte pal prin museu dai adesîfs, metût in rêt di Vittore Baroni. Tra un adesîf e un altri (mandâts vie pe pueste, ma za contâts sul web), a son rivadis lis cartulinis, tant che chê fate riciclant une plantute di Udin, dade fûr dilunc «Friuli doc», e piturantji parsore l’incident che i capità tal Mai dal an passât. Un mût par fevelâ de sigurece stradâl, e dîs la artiste, che e marche la finalitât critiche sociâl des sôs voris. Cussì, e je nassude ancje miss Precariglia, selezionade, tal 2006, tal concors inmaneât di Anmil e Inail.
Lavôrs difarents, ma caraterizâts di une grande capacitât di sintesi, che e salte fûr ad implen tai «toy child», i «fruts zugatui» che a contin i piçui protagoniscj di une contemporaneitât massificade, che e somee pierdi di voli la unicitât dal sogjet a pro di une identitât omologade. I «toy child» a son oparis plenis di colôr. Nissune ombrelûs, ni tridimensionalitât. Il lengaç visîf al favorìs colôrs smaltâts e contrastants in cjamps plats e sierâts. A son voris in aparence semplicis, ingjenuis, cence pinsîrs. Ma a nassin di un progjet che Silvia e puarte indevant di agns, cjapant dal mont de strade, e de rêt, par fâ une campionature di umanitât, che la artiste e torne in forme di piture intune culture popolâr globâl, dulà che il fumut al incuintre la imagjine publicitarie, il pinel al ibride il software, la ilustrazion e la computer grafiche. In sumis, une riflession su la vite di vuê, fate cuntun lengaç comerciâl, facil, svelt, consumistic. Ogni «toy child» – la imagjine no reâl di une persone reâl – al è un microcosmi che, daûr de aparence omologade e omologante, al ferme une esperience di vite intense, dificile di esprimi.
Erika Adami

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +