Se la societât e mûr, no je vite in ogni altri so ambient, nancje culturâl

Al è stât un timp cuant che dutis lis robis a jerin bielis. Une sorte di paradîs pierdût dulà che lis formis di organisazion dal spazi, in ecuilibri perfet cu lis condizions naturalis e lis organisazions socialis, a mostravin la lôr configurazion otimâl. Ma cumò, il disorientament gjenerâl che al impedìs di definî il sens di une societât furlane al è rivât in somp.
Tancj, miôr di me, a àn scrit avonde su la dissezion de societât furlane. Jo, tai ultins timps, mi soi limitât a rimarcjâ di cemût che il teatri nol sedi stât bon in dì di vuê di interpretâ il dificil passaç che al travane la nestre societât, di vê rinunziât a penetrâ un cjamp di indagjin une vore complicât, forsit par pôre di dulà che chest percors lu varès puartât. Par chel o ai scrit su chestis pagjinis che il faliment de Farie Teatrâl Furlane al nas de crise de interie societât furlane. Vâl a dî che se la societât no à un progjet par se stesse, no podarà transmeti il so discors a cualsisei ambient culturâl che al puedi fâ di spieli, di stroment di elaborazion, di rispueste e di sburte.
Provìn a partî dal imprin: cemût îsal gambiât il nestri mont? Une volte, ogni segn dal teritori al jere in podê di contâ une storie, al jere bon di evocâ in ogni membri de comunitât un comun orizont simbolic di riferiment, une sorte di sintiment di partecipazion. La fin di chest mont, che si contave midiant dal so leâm cu la tradizion orâl, al è finît cul taramot dal 1976. Par un paradòs, ancje avonde comprensibil, il taramot al à produsût la nostalgjie par ce che nol jere plui, intant che un pôc par volte la ricostruzion fisiche e sociâl, e scancelave i segns dal teritori. Al è stât in chel moment che un pinsîr leât a la nostalgjie al à metût lis alis e si è petât intun svol simpri plui alt, talmentri alt che nol jere plui bon di viodi abàs il teritori dulà che lis robis a vevin finît di fevelâ. I scritôrs, i contestoriis nassûts in chel periodi, a jerin in svol, ma intant la piste di atieriment i a la vevin gjavade e l’aeropuart al jere deventât licuid.
Si sa che tal vocabolari des Piçulis Patriis la peraule ‘inovazion’ no esist (si salte dret par dret di ‘inovâl’ a ‘inrabiadure’) par un motîf une vore sempliç: dispès, par ricognossisi, une Piçule Patrie e je obleade a riferîsi a cierts valôrs de tradizion che aromai a son considerâts vueits pal nestri mont. Ve ca alore che une struture sociâl, sacrabolt!, imbote si inacuarç che dut un sisteme di normis di autogjestion, di condivision, di cognossince, di patrimoni naturâl e costruît, di specific culturâl, insumis, al è sparît, e, soredut, che se al fos ancjemò presint, nol corispuindarès plui a la sô bisugne. E, cjalantsi ator, cheste struture sociâl, che magari e fevele ancjemò par furlan, si inacuarzarès che il so teritori, liberât – par mût di dî – dai vincui e da lis formis de tradizion, vâl a dî disprivât di identitât e di costrut, al pues jessi manipulât e trasformât intun spazi astrat e compagn di ducj chei altris.
Alore, la sorprese e je chê che ancje la societât furlane e je deventade compagne di dutis chês altris: ancje achì si è dade dongje une gnove idee di individui, che al à in se simpri plui i caratars di une sogjetivitât autonome, distacade dal dut, disfrancjade de partinince a une comunitât o a une tiere. No vin plui un furlan che al fâs di bessôl, ma un furlan che al è di bessôl, ma nol sa parcè.
Cheste e je la responsabilitât che si puarte intor la Farie Teatrâl Furlane (ancje se e je rivade buine ultime in cheste soporifare cjaminade), soredut pai mieç economics metûts adun: chê di no jessi stade buine di svilupâ e di indentrâsi tal indispensabil cjamp di indagjin su dulà ch’e je rivade la nestre presumude societât furlane e dulà ch’e je daûr di lâ.
Alore si à di stâ atents di doprâ dutis lis ocasions che si presentin par tacâ a fevelâ di chestis cuistions. Magari partint di Ruvigne, dulà che dal mês di Mai, Sandri Di Pauli e Ane Gubiani, vâl a dî i doi sociis dal Mateârium, a tachin un laboratori di gnovis dramaturgjis, cu la intenzion di formâ gnûfs scritôrs, inzornâ i professioniscj e prudelâ la lenghe furlane come un possibil stroment teatrâl.
Ma la forme no pues fâ di mancul dal contignût. Il spirt dal nestri timp, par un altri paradòs, al sburte a preferî lis diferencis rispiet a la uniformitât, l’individualitât (e magari une altre volte o fevelarìn, daûr di ce che al dîs Baumann, incirche dal compit impossibil che la societât licuide i conferìs al individui) rispiet a la omologazion, ma midiant dai mass media al cîr di trasformâ la diference intune operazion estetiche di imbalsamadure, plui facile di capî, dulà che la inmagjin e cjape il trat rispiet a la realtât. Cirìn di sghindâ il pericul, sinò no si salte fûr dal pantan.
✒ Franco Marchetta